Siman pasa 515 pakete di 250 gram di cocaina procedente di Corsou intercepta den waf di Vlissingen, e droga aki tabata pertenece na un conexion grandi di droga entre Corsou y Twente, e banda di droga aki a wordo desmantela dia 30 di Juni ultimo.
Na momento cu nan a desmantela e conexion di droga entre Corsou, Twente y Achterhoek, polis a topa cu 73 kilo di cocaina den un container na Silvolde.
Vlissingen & Oost Nederland:
Siman pasa a yega na e waf di Vlissingen un barco procedente di Corsou cu dos container cu droga den nan.
Prome cu yegada di e barco, tabata momentonan di hopi tension pa polis y husticia, cada biaha cu nan mira riba radar cu e barco ta yegando mas cerca, pasobra nan tabata sa caba cu riba e barco aki tin droga scondi, e cantidad no tabata conoci, te ora cu e barco a mara den e waf na Vlissingen. E destino final tabata Oost-Nederland.
201 kilo di Cocaina
Riba papel e container tabata carga cu piedranan di kalki, pero en realidad tabata tin adicional 128 kilo di cocaina scondi den e containernan. Douane recherche a bin topa den e dos container nan 515 pakete di 250 gram di cocaina den cada un. E siman anterior polis a anuncia cu nan a topa cu 73 kilo di cocaina scondi den un container na Silvolde. En total di e conexion di droga aki autoridad a logra intercepta mas o menos 201 kilo di cocaina na balor di 15.075.000 Euro. E droga mientrastanto a keda destrui caba pa autoridad.
13 entrada hudicial
Como 400 polis, trahadonan di defensa Hulandes y tambe di varios departamento gubernamental y mas, a logra desmantela un conexion basta pisa di droga entre Corsou y Oost Nederland, esaki a tuma luga dia 30 di juni ultimo. Autoridad a haci 13 entrada Hudicial na diferente edificio y cas, entre otro na Hengelo, Enschede, Silvolde pero tambe na Zuid Holland y Alemania.
Durante e entradanan hudicial entre otro na Hengelo, polis a confisca un cantidad grandi di placa cash, articulonan di luho, administracion y autonan.
Shete sospechoso
Como 7 persona a wordo deteni como sospechoso, entre nan un homber di 48 aña biba na Hengelo y un homber di 75 aña biba na Megchelen (Achterhoek).
Un sospechoso a wordo laga den libertad diamars siman pasa. E otro 6 sospechosonan a keda den voorarrest, diabierna 1 di juli nan a presenta dilanti Hues Comissario na Corte di Husticia na Almelo y nan detencion a wordo prolonga.
Niun contacto
Nan no mag di tin contacto cu niun persona y nan abogado no por duna mucho informacion referente e contenido di nan caso. Kiko exactamente cada un di e 6 persona nan aki ta wordo sospecha di dje y ki rol nan tin den e conexion no ta conoci.
