Home Local ROTARY CLUB ARUBA TA INSTALA DIRECTIVA NOBO PA 2022-2023

ROTARY CLUB ARUBA TA INSTALA DIRECTIVA NOBO PA 2022-2023

SHARE

 

Riba diasabra 2 di juli 2022, Rotary Club Aruba a instala su directiva nobo pa 2022–23. Presidente saliente Frederick Nuboer a hiba palabra un rato unda e la desea e Presidente di aña Rotariano venidero tur clase di exito y gradici e miembronan y di e club cu a sa di duna nan sosten pa asina Rotary Club Aruba por a sigui cu su aporte y sosten na diferente fundacion riba nos isla.

E anochi a sigui cu instalacion di e directiva nobo bou di guia di Shelby Maduro, apunta como e siguiente presidente di Rotary Club Aruba pa aña 2022 – 2023. Shelby ta miembro di Rotary Club Aruba desde 2016. Shelby ta e di dos hende muher pa lidera e club aki cu tin 84 aña di existencia na Aruba. Shelby ta den e famia di Rotary Club Aruba desde aña 2013 como miembro y tambe Past President di Rotaract Club of Aruba na aña 2015, e tabata tin diferente rol e ultimo añanan den Rotary Club Aruba y un di su passion nan tabata traha cu e clubnan di Interact. Shelby tin curazon pa desaroyo y yudansa den nos comunidad. 

E otro miembronan di directiva a keda como lo siguiente: América Barrios (secretaria), Edsel Lopez (tesorero), Frederick Nuboer (presidente saliente), Luis Oduber (director di administracion di e club y vice presidente), Ryon Dijkhoff (director di imagen publico), Sanju Luidens (director di miembrecia y secretaria elegi), Stanley Looman (director di proyectonan comunitario), Orlando Hoevertsz (director di Rotary Foundation) y Ravee Nandwani (sergeant at arms).

Durante e anochi di instalacion, Shelby a haci entrega tambe di reconocimento na Presidente Saliente di Rotary Club Aruba Frederick Nuboer cu un Paul Harris 1 Sapphire  award pin pa su bon trabou durante e aña cu a pasa y asina termina su presidencia den un forma super ameno y positivo.

Presidente Shelby a hiba palabra gradiciendo e directiva saliente pa e bon trabou ehecuta. E directiva e aña aki lo kier sigui enfoca pa contribui na trece positivismo y animo den nos comunidad por medio di diferente proyectonan di Rotary Club Aruba, sin lubida e famoso Fiesta Rotaria cu den e ultimo 2 aña no por a ehecuta.   

Presidente Shelby ta sumamente orguyoso di e impacto positivo cu e famia di Rotary tin den nos comunidad. Rotaract Club Aruba y clubnan Interact Club Colegio Arubano, Interact Club Aruba na de Schakel College y Interact Club na International School of Aruba a bin ta hasi un tremendo trabao cu diferente proyecto nan.

Na final Presidente Shelby kier a gradici tur esnan cu a haci e anochi di instalacion posibel.