Den Haag – Den menos di un luna Arubahuis y studiementornan lo ricibi e grupo nobo di studiantenan pa 2022 cu lo bin sigi un estudio na un HBO of na un Universidad na Hulanda.
Te awor aki Arubahuis ta spera rond di 300 studiante lo bin Hulanda.
E preparacionnan pa e opvang ta cuminsa na momento cu Arubahuis ricibi di Departamento di Enseñansa di Aruba un lista di studiantenan cu a indica di lo bin Hulanda. E studiantenan ta keda dividi entre e mentornan. Di e momento aki e mentornan ta cuminsa cu nan trabao cu ta encera entre otro tuma contacto cu e studiantenan. Manda nan un formulario cu pregunta cu nan mester yena. E mentornan ta organisa encuentronan online pa duna informacion y pa cera conoci cu e mentor y e POC (Plaatselijke Opvang Commissie). Ta traha un groupsapp pa asina na un manera rapido por intercambia informacion cu e grupo. Si algo no ta mucho cla, lo yama e studiante pa clarifica un ke otro.
E rason mas importante pa esaki ta pa saca afor si e studiante a regla un camber of adres fiho pa biba. Tambe e meta di e contacto aki ta pa tempran detecta eventual problema cu e studiante por tin prome cu e yega Hulanda. Problema cu nan registratienummer na Studiefinanciering di DUO, cu studielink, Studiekeuzecheck y preguntanan over nan Arubalening.
E mentornan ta forma un POC cu ta consisti di studiantenan activo cu ta studiando caba (oudejaars). E grupo di studiantenan aki ta entusiasma y ta dispuesto pa den nan vakantie guia e grupo nobo di studiante den nan ciudad di estudio, duna informacion y tips tocante studia, biba na Hulanda, haci compras, lugarnan di sali y hopi mas. Diferente di e POC aki tin nan mesun website of FB pagina.
E mentor conhuntamente cu e POC ta traha un programma pa e opvang. E programma pa opvang por varia pa ciudad. E parti mas importante di e programma ta pa inscribi e studiantenan na gemeente. Asina cu esaki keda procesa, e studiante por ricibi su BSN (Burger Service Nummer) nummer. Na algun gemeente por dura 3 pa 4 siman prome cu e studiante haya un BSN nummer. Mester tene na cuenta cu e studiantenan ta yega den periodo di vakantie y cu hopi functionario di e gemeentenan ta cu vakantie. Despues ta sigi asuntonan cu mester keda regla por ehempel habri un cuenta di banco na Hulanda, regla un code pa DiGid (identidat digital), regla OV (Openbaar Vervoerskaart)-chipkaart, na Studiefinanciering di DUO ta controla si tur informacion ta corecto y si mester informacion adicional.
Tambe ta organisa tripnan pa conoce e ciudad, yuda cu drecha nan camber, busca un dokter di cas, dentista y un botica, informacion riba uso di transporte publico. Tambe ta organisa actividadnan social pa e studiantenan por cera conoci cu otro y cu e mentor.
Ta encurasha e studiantenan pa participa na e programma di introduccion di nan scol. Ta hopi importante pa e studiantenan participa na esaki pa haya mas informacion di nan scol, haci amistad y crea un circulo nobo di amigonan cu por ta un sosten den e prome lunanan di nan estudio.
E mentornan despues di e dianan di opvang ta keda den contacto cu e studiante pa medio di email, telefoon of un combersacion personal.
E studiantenan cu yega Hulanda mas laat cu e grupo di studiante tambe ta haya aviso y informacion riba kico tur nan mester regla na Hulanda.
Arubahuis tur aña ta haci tur loke ta posibel pa ricibi y vang op e studiantenan nobo cu ta bin Hulanda pa studia. Esaki semper den cooperacion estrecho cu e studiementor y e POC nan.