Home » Parlamentario Ricky Hoek (MEP): Ley di Kinderopvang ta fortifica Centronan di Cuido di Mucha y desaroyo di nos muchanan

Parlamentario Ricky Hoek (MEP): Ley di Kinderopvang ta fortifica Centronan di Cuido di Mucha y desaroyo di nos muchanan

by Admin
0 comment 73 views

 

 

Dialuna 4 di juli ultimo, Parlamento di Aruba a aproba e cambionan redaccional di e ley di ‘Landsverordening Kinderopvang’ pa asina e ley por drenta na vigor entrante medio di e aña aki. E prome concepto di ley di kinderopvang a keda aproba caba desde aña 1998. 

 

E spirito di e ley di kinderopvang ta pa tin un cuadro legal den cua e centronan di cuido lo mester cumpli cu un exigencia di calidad minimo pa loke ta trata nan facilidadnan pa cuido, educacion y guia di nos muchanan. Di e manera aki por garantisa cu tur centro di cuido ta traha na e mesun nivel, tur mucha ta haya y crece den e mesun desaroyo y ta preveni pa tin casonan di negligencia y abuso di mucha. 

 

Pa e ley aki por ‘biba’ y keda implementa debidamente, gobierno a instala un stuurgroep ‘Departamento di Mucha y Hoben’ cu ta traha incansablemente na diferente aspecto di e ley aki. Por ehempel, awor aki ta yegando den e fase final di concretisa e Manual di Regulacion den Centro di Cuido di Mucha Aruba (Handleiding Kwaliteitseisen Kinderopvang Aruba).  A base di e manual aki, centronan di cuido di mucha tin un guia pa loke ta trata e cambionan na diferente nivel cu nan lo mester introduci den nan localidadnan. Asina por ehempel na juni di 2020 caba e Taskforce Bedrijf COVID-19 den colaboracion cu Minister di Asunto Social y Labor a haci un bishita y inspeccion na 165 centro di cuido di mucha. Asina por bisa cu 72 a cumpli cu e rekisitonan y 4 mester a haci algun adaptacion y demas tabata sera debi na e pandemia. Pa por cumpli cu tur exigencia di seguridad y adaptacion den e centronan, tin un temporada di transicion di 3 pa 5 aña pa e centronan di cuido di mucha por introduci nan cambionan.

 

No solamente riba e localidadnan ta pone atencion, pero tambe riba e conocemento y desaroyo di e guianan pedagogico cu ta traha den e centronan di cuido di mucha. Asina tin 56 guia pedagogico cu ta den e opleiding di SPW na nivel di MBO 3 y lo termina nan estudio na december di 2023. Adicionalmente tur e centronan di cuido a haya un curso di Codigo di Proteccion pa asina upgrade y fortifica e guianan pedagogico den nan trabounan diario. 

Ademas, dia 29 di april di e aña aki e experto Dr. Kelly Hantak di University of Missouri – Kansas City Institute for Human Development a duna un training tocante e herment di screening ‘Developmental Milestones Matter’ cu ta yuda observa y señala e desaroyo di muchanan. Di e manera akin a un edad trempan e muchanan por wordo yuda cu nan habilidadnan y caminda cu mester di mas atencion esaki lo wordo trata debidamente. 

 

Finalmente ta importante pa menciona cu e screeningnan aki lo yuda yega na un data cu tambe lo yuda Aruba ricibi sosten financiero di e fondonan internacional. E stuurgroep di DMH ta trahando riba acumulacion di data, pa haya mas fondo cu ta posibel pa e proyecto piloto aki ta uno exitoso. E proyecto aki ta fundamental pa por brinda tur mucha un oportunidad igual, p’asina por atende un scol regular y ta un miembro activo di nos comunidad independiente. Conluyendo por bisa cu e ley di kinderopvang lo trece cambionan positivo na bienestar di tanto e mucha, e guía pefdagogico, mayornan, centronan di cuido di mucha y nos sociedad en general.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio