Home Corte Hues ta habri caso bek den caso asesinato Shayuri

Hues ta habri caso bek den caso asesinato Shayuri

SHARE

 

ORANJESTAD –  Awe mainta Hues a tuma un decision mas tempran den e lamentable caso di tira mata e dama Shayuri (19) riba 4 Juni 2021, caminda e sospechoso principal ta Izak Principaal.

Manera Arubanative a informa dia 24 Juni 2022, ta un serie di delito Izak Principaal hunto cu Zuriel Celaire a haci. Fiscal a exigi 11 aña di prison pa Izak mientras cu pa Zuriel el a exigi 6 aña di tratamento obligatorio sera di un institucion.

HUES A HABRI INVESTIGACION BEK

Awe mainta via video conference, Hues a bisa cu e motibo cu el a tuma un decision mas tempran, ta pasobra cu e kier haya mas informacion pa por tuma un decision corecto den e caso di Izak.

Hues a bisa cu e ta habri e investigacion bek pa Izak. Hues ta haya cu e no tin suficiente informacion pa cu e hechonan y si Izak ta responsabel of menos responsabel pa su actonan. Hues a sigui bisa cu e kier informacionnan bon pa asina por dicidi si ta bay usa e ley penal pa adulto of e ley pa hubentud pa condena Izak.

RAPOR DI PSYCHIATER NO COMPLETO

Hues a mustra cu evaluando e caso, el a constata cu e raport di psycologo ta mustra cu Izak no ta responsabel pa su actonan. Hues ta haya bon motiva di psycologo cu mester aplica ley di adulto y pone Izak na disposicion di Gobierno (TBS).

Sinembargo, Hues ta mustra cu psychiater su evaluacion no ta completo. Psychiater ta haya Izak culpable pasobra ta e mes a bay haci’e. Hues no ta haya aki suficiente splica. Tampoco Hues ta haya suficiente splica e conclusion di psychiater.

BUSCA OPINION DI PSYCHIATER DI CURACAO

Hues a bisa cu e kier haya informacionnan concreto pa asina e por evalua e caso corectamente y yega na un conclusion cu segun ley ta exigi. Hues a bisa cu e ta bay apunta un psychiater di Curacao pa bin Aruba pa evalua Izak. El a bisa cu pa dia 26 di Augustus 2’or di merdia lo sigui cu e caso pero pro forma, pa mira con leu psychiater ta cu e raport.

Cu e decision di Hues, ta mira claramente cu Corte no ta tolera pa psychiater di Aruba, core traha un raport den pura. Corte ta depende riba evaluacion amplio pa asina por tuma un decision corecto. Esaki ta un señal bon cla den direccion di psychiater di Aruba pa percura pa haci trabao manera ta spera di un psychiater.