Home Local Gasolin Station nan di Aruba: Entrante 13 di juli 2022, nos no lo...

Gasolin Station nan di Aruba: Entrante 13 di juli 2022, nos no lo por ricibi pago mas pa medio di tarheta di Maestro / Debito di banco. 

SHARE
Debit Card

Den nomber di Associacion di Gasolin Stations di Aruba kier a notifica communidad di Aruba cu entrante 13 di juli  2022, nos no lo por ricibi pago mas pa medio di tarheta di Maestro / Debito di banco. 

E operacion di un gas station ta consisti di e venta di gasolin y diesel, na un prijs stipula mensualmente pa Gobierno  di Aruba, pa medio di Minister di Economia.  

E modelo / formula a base di cual e prijs aki ta wordo calcula ta un modelo di tempo di Lago. E modelo aki no ta inclui gastonan operacional cu nos ta bin ta enfrenta e ultimo 30 / 40 añanan den mundo di  comercio. 

Por ehempel gastonan di mantencion, bancario, di seguro y aumento obligatorio door di decision di gobierno etc. 

Specificamente e gastonan bancario, e asina jama “fees pa swipe cu Maestro / Debito” ta e ultimo druppel cu a  causa e decision aki. Cualkier otro negoshi por calcula su gastonan, agrega su margen y asina dicidi riba un prijs di  venta na su clientenan. 

Den nos caso, esaki no ta posibel, nos ta traha a base di prijsnan y un margen di ganashi stipula pa Gobierno di  Aruba. 

Den e prijs calcula pa gobierno aki, tin un margen chikito per LITER cu nos ta keda cune pa paga nos empleadonan, mantencion di nos stacionnan, seguro y tur otro gastonan operacional cu nos ta enfrenta. E suma actual pa un gas station ta stipula na 14.5 cent pa liter di gasolin y 12.9 cent pa liter di diesel. Esaki no ta  cambia ora cu gobierno ahusta prijs di gasolin of diesel, esaki ta un suma fiho, cu e prijs subi of baha. 

Un ehempel, cliente ta presenta serca nos cu su auto di famia y ta cumpra 100 florin di gasolin, a base di e prijsnan  actual, 3.212 florin per liter, 31.133 liter lo wordo bendi na e cliente. 

Di e venta di 100 florin, gas station ta keda cu unicamente 4.51 florin pa paga TUR su gastonan, salario di  empleadonan, pensioen di empleadonan, gastonan bancario, Elmar, Web, Setar, seguro, mantencion etc. Si e cliente  paga cu Maestro, banco lo cobra 0.75 florin na commission (0.75% di cada transaccion) y e station lo keda cu  solamente 3.76 florin pa cubri tur su gastonan. Lo demas di e 100 florin ta wordo paga na gobierno di Aruba, direct of  indirect, sea via departamento di impuesto, o via gobierno su compania estatal FMSA cu ta e unico distribuidor di  gasolin & diesel na Aruba. 

Al mismo tiempo, AGDA tin cu menshona y gradici 2 banco cu pa decadas a sostene nos miembronan. Esakinan ta  RBC y CMB. Ambos banco a sostene nos miembronan door di no cobra nos e porcentahe na momento cu cliente  paga cu un tarheta di Maestro / Debito na nos stations. Sinembargo, e siman aki CMB a cuminsa cobra un  commission riba cada florin cu nos cobra cliente, y RBC tambe lo ta introduciendo esaki. Nos miembronan a dicidi di uni nan mes ja cu nos no por sigui asina mas. 

Den pasado nos a absorba obligatoriamente hopi gasto y incremento sin tin manera di recupera esakinan den venta. Un commission riba e venta, manera cu banconan lo bai cobra, no ta posibel pa nos absorba, mirando e subida di  prijs di gasolin y diesel, e gasto lo keda subi, paso banco ta cobra un porcentahe di e suma cu nos mester cobra  cliente, no un porcentahe di nos entrada, ni tampoco un gasto fiho. 

Pa e motibo describi aki riba, AGDA a dicidi cu entrante diaranson 13 di juli 2022, nos miembronan no lo por tuma  carchi di Maestro / Debito mas pa pago na nos gas stations, te ora cu Gobierno di Aruba por incorpora e gastonan  adicional aki den nos gastonan di operacion. 

Na nos clientenan nos disculpa pa e inconveniencia y danki pa e comprencion pa cu nos situacio