Decision final di gerencia a wordo anuncia den sesion informativo den Parlamento
Riba Diaranson mainta Juli 6, Eagle LNG a bin pa reuni cu Parlamento pa duna informacion di e ultimo desaroyonan di e Proyecto di LNG. Di parti Eagle LNG tabata presente sr. Sean Lalani y Sr. Alejandro Bastardo pa duna un presentacion y pa contesta preguntanan di parlamentarionan presente. E presentacion cu a wordo duna, tabata uno hopi informativo. Entre otro a wordo mustra y splica detayadamente na unda e facilidad di Eagle LNG lo wordo construi.
Tambe a mustra diferente puntonan di desaroyo manera: 1) Descripcion di e Proyecto, 2) Actividadnan di Desaroyo, 3) Seguridad di Tuberia di Gas, 4) Estudio di Environmental impact Assessment, 5) Statisticanan di Tuberia di Gas. Un di e anuncionan importante tabata ora sr. Sean Lalani a bisa cu e tuberia pa e gas natural lo wordo poni bao tera. Parlamento por a haya un bista di e diferente metodonan cu compania Eagle LNG lo bay usa pa por logra pone e tuberia bao tera. E anuncio aki sin duda ta uno hopi spera y awor pueblo tambe sa exactamente kico lo bay sosode cu e tuberia.
Sean Lalani CEO di Eagle LNG a subraya cu henter mundo ta den un crisis di energia. Prijs di petroleo y gas ta halto tur caminda. Sinembargo e prijs cu Aruba a haya di Eagle LNG no ta wordo afecta pa e aumento global di e prijs di gas natural. Esaki pasobra entre otro nan mes ta productor di LNG gas. Esaki sigur no tabata e caso cu Gas Unie cu cual AVP kier a cera un contract pa laga WEB Aruba NV traha cu gas. Esaki lo a resulta den un prijs hopi mas caro pasobra no lo a cumpra gas di e productor sino di e rebendedor.
Tambe sr. Lalani a informa parlamento con e cruiselinenan grandi ta cumprando barco nobo cu ta funciona solamente riba gas natural. Esaki ta importante pasobra Eagle LNG a anuncia cu nan a cera un contract cu Royal Caribbean Cruise Lines pa fuel nan barconan cu LNG Gas. Royal Caribbean a ahusta e rutanan di su cruceronan pa e lugarnan unda cu tin bunkering station di Eagle LNG gas. Tur esaki ta aporta na economia di Aruba y ta un gran oportunidad pa nos por haya mas turismo di barco, entrada di benta di LNG gas pa via di impuestonan, pasobra Eagle LNG lo construi un bunkering station aki na Aruba.
Pa duna mas informacion na e pueblo di Aruba, Eagle LNG lo trece su expertonan na Aruba pa duna sesionnan di informacion na publico en general. Riba Diamars Juli 12, pa 9:00am-1:00pm lo tin e prome sesion. Despues e siguiente dia Diaranson Juli 13, di 2:00pm-5:00pm e di dos sesion, y riba Juli 14 Diahuebs, di 6.30pm-9:00pm lo tin e ultimo sesion. Lugar pa tur tres e sesionan lo ta MFA Savaneta. Si bo tin algun inkietud, duda, pregunta of bo kier mas informacion, bo ta cordialmente invita na e sesionnan aki di informacion.
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!