Home Police Un biaha mas AVP, MAS y Accion21 a demostra di ta contra...

Un biaha mas AVP, MAS y Accion21 a demostra di ta contra esnan den mas necesidad den comunidad

SHARE

 

 

Kende den e pais aki no ta corda e fecha di 13 di maart 2020, momento cu Aruba a cera conoci cu e prome 2 casonan di Coronavirus? Kende no ta corda con miles di trahadornan di horeca a keda desampara sin trabao y alavez a keda sin pan riba mesa pa cria nan familia durante henter e periodo di pandemia? Kende no ta corda con e ultimo avion a bandona Aruba cu turistanan y cu henter e area di hotelnan a ser converti den un ‘ghost town’ sin ningun turista den hotel y riba beachnan? Kende no ta corda tur e medidanan cu e crisisteam y Gabinete Wever-Croes a implementa manera Shelter in Place y Toque de Queda y p’asina frena e contagio di e virus mortal? Esakinan ta algun di e  preguntanan cu Partido MEP kier a haci na e parlamentarionan di AVP, MAS y Accion 21 cu dialuna anochi a vota contra e ley di FASE. 

 

Un gobierno responsabel y humano

Hecho ta cu den e situacion penoso cu nos pais a pasa aden debi na e pandemia, nos tabatin un gobierno responsabel y humano cu a logra pa institui den un periodo cortico di 1 siman e proyecto FASE. Esaki a encera cu tur esnan cu a perde trabao den horeca y otro negoshinan a haya un suma di 950 florin pa luna cu a yuda nan den nan necesidadnan di mas urgente y esaki sin importa nan color politico. 

Mester enfatiza cu tabata un periodo sumamente doloroso cu nos pais a experencia e momentonan ey ya cu e pandemia no a bin cu un manual cu nos mandatarionan por a gara na dje y p’asina contra-aresta tur  efectonan negativo di e pandemia aki. Pero nos gobierno tabatin e curason na e lugar corecto y cu gran creatividad y inteligencia a logra trece alivio pa esnan den mas necesidad creando e proyectonan FASE y subsidio di salario.  

 

Opositornan sin compasion

Awe e politiconan di oposicion di AVP. MAS y Accion21 sin ningun compasion ta ataca e minister encarga Glenbert Croes y otro ministernan haciendo como sifuera cu henter e proyecto di FASE a ser ehecuta den forma coruptivo. Cu e criticanan descabeya aki nan kier condena tambe e 12246 personanan cu a haya FASE y di cual un suma di 79 miyon florin a ser paga na e famianan humilde aki. FASE a wordo ehecuta mediante 12 punto di accion y tur esnan cu a haya e ayudo mester a cumpli cu e rekesitonan aki. E periodo di ehecucion a cuminsa na april 2020 y a termina na november 2021. Pues 20 luna largo miles di hogar rond Aruba a beneficia di e Proyecto FASE! 

 

Te ainda no ta conoci pa nos di MEP kico realmente a pasa den mente di e politiconan di AVP, MAS y Accion21 cu dialuna anochi a vota contra e ley di FASE. Hecho ta cu un biaha mas nan a demostra cu nan ta contra esnan cu a perde trabao durante e temporada di pandemia, pues contra e 950 florin di ayudo pa esnan den necesidad. Sinembargo ora ta toca directornan cu ta ricibi salario di mas di 27 mil florin pa luna, e opositornan di AVP y MAS  ta e promenan para den rij pa sali na defensa di e salarionan barbaro aki. Asina un y tur por mira pa nan mes cual grupo e politiconan aki kier sirbi y kendenan alavez ta bira cara pa esnan mas humilde den comunidad.