Desde 16 di maart ultimo e muchanan y hobenan na e isla di St. Eustatius ta yama tur dia di 2:00 pa 6:00 di atardi e number 918 Guana Chat y ta ricibi oido, informacion, guia y conseho for di e mentornan di Fundacion Telefon pa Hubentud Aruba. Tur esaki ta den cuadro di e ‘kenniscentrum’ di Fundacion Telefon pa Hubentud Aruba cu ta exportando conocimiento den region.
Desde awe 27 di juni 2022 pa 2:00 di atardi e muchanan y hobenan di e isla di Saba tambe ta bai cuminsa ricibi oido, informacion, guia y conseho for di e mentornan di Fundacion Telefon pa Hubentud Aruba. Mescos cu na Aruba, e yamada lo ta gratis y anonimo.
Mescos cu Openbaar Lichaam St. Eustatius, Openbaar Lichaam Saba tambe a haci un peticion na Fundacion Telefon pa Hubentud Aruba pa ricibi e yamadanan di e muchanan y hobenan di e isla di Saba y duna e muchanan y hobenan ayudo. Tambe durante un combersacion cu e Secretario di Estado di ‘Volksgezondheid, Welzijn en Sport’ di Hulanda di e tempo ey, drs. Paul Blokhuis, e a haci un biaha mas e peticion na Fundacion Telefon pa Hubentud Aruba pa ricibi e yamadanan di e muchanan y hobenan di Saba. Diasabra ultimo e Secretario di Estado nobo di ‘Volksgezondheid, Welzijn en Sport’ di Hulanda, Maarten van Ooijen, a firma un acuerdo di cooperacion cu Fundacion Telefon pa Hubentud Aruba den cual e servicio door di Fundacion Telefon pa Hubentud Aruba na e muchanan y hobenan di St. Eustatius, Saba y Bonaire ta regla.
Prome cu e muchanan y hobenan di e isla di Saba por a cuminsa haci uzo di e servicio di Fundacion Telefon pa Hubentud Aruba, e mentornan di Fundacion Telefon pa Hubentud Aruba a ricibi un training tocante e aspectonan etnico, cultural, enseñanza y educacion di e isla di Saba. Tambe testnan tecnico a tuma lugar pa sigura cu e yamadanan ta drenta manera mester ta.
E servicio na e muchanan y hobenan di e isla di St. Eustatius y awor e isla di Saba ta den cuadro di e ‘kenniscentrum’ di Fundacion Telefon pa Hubentud Aruba cu ta exportando conocimiento. Despues di 22 aña di existencia Fundacion Telefon pa Hubentud Aruba como un ‘Kenniscentrum’ ta exportanando conocimiento na organisacionan gubernamental y no-gubernamental den region. Banda di crea conocimiento y comparti conocimiento, awor Fundacion Telefon pa Hubentud Aruba como un ‘Kenniscentrum’ ta bai sigui exporta conocimento.
Un gradicimento ta bai na Aruba Airport Authority N.V., Web Aruba N.V., Setar N.V., Satel, Openbaar Lichaam Saba, Ministerie van Volksgezondheid, Welzijn en Sport Nederland y Ministerie van Binnenlandse Zaken en Koninkrijksrelatie.
Pa mas informacion tocante di e servicio cu Fundacion Telefon pa Hubentud Aruba ta dunando na e muchanan/ hobenan di e isla di Saba por tuma contacto cu Fundacion Telefon pa Hubentud Aruba via nos facebook: https://www.facebook.com/telefon.hubentud/, email: [email protected] of telefon 5886138/ 5884011.