Home Politics Minister Xiomara Maduro ta informa: Dia 1 di juli ta haci 159...

Minister Xiomara Maduro ta informa: Dia 1 di juli ta haci 159 aña di abolicion di sclavitud door di Hulanda den e colonianan Surinam y Antias Hulandes

SHARE

 

 

Aruba tambe tin su historia di sclavitud

 

– Minister di Cultura, Xiomara Maduro ta informa cu dia 1 di juli ta cumpli 159 aña cu Hulanda a duna esclavonan di Surinam, islanan di Aruba, Boneiro, Corsou, St. Maarten, St. Eustatius y Saba, nan libertad. E historia di sclavitud na Aruba no ta mucho conoci y pesey como parti di e formacion di nos propio identidad ta importante pa Pueblo haya sa mas di e parti menos bunita aki di e historia di nos Pais y di Reino Hulandes.

 

Aruba tambe tin su historia di sclavitud

Na Aruba tambe tabatin esclavo, aunke na un cantidad menos cu na e otro isla nan di Reino Hulandes na unda tabata tin negoshi di benta di esclavo y plantacionnan grandi unda esclavonan tabata traha. Segun investigacion haci, e esclavonan na Aruba tabata traha na cas, den tienda di nan doñonan, como cuidado di bestia of den cunucu. Na aña 1863 na momento di e emancipacion di esclavo, un cantidad di casi 500 esclavo a logra haya nan libertad na Aruba. No obstante cu esaki ta un cantidad limita, e ta parti di historia di sclavitud na Aruba.

 

Varios investigacion riba sclavitud na Aruba

Tin varios experto cu a haci investigacion riba sclavitud na Aruba y riba nos historia colonial cu a resulta den documento, buki y documentario. Minister di Cultura ta invita pueblo pa bishita Archivo Nacional di Aruba y Sala Arubiana di Biblioteca Nacional Aruba pa cera conoci cu mas di e historia di sclavitud na Aruba. Na Archivo Nacional Aruba, por ehempel, tin varios storia di esclavo y tin un registro den cual tin famnan cu ta descendiente di esclavo. Un storia conoci ta esun di Virginia Dementricia Gaai, kende tabata un esclavo rebelde y di cual varios famia na Aruba ta descendiente. Na Hulanda a nombra un caya na Rotterdam na su nomber, Virginia Gaaipad.

 

Historia di sclavitud ta topico actual den Reino

Na juli 2020 e Minister di Relacion Interior y di Reino di Hulanda a forma un comision di conseho di varios profesional den Reino Hulandes y di Surinam pa organisa dialogo social tocante e topico di e pasado di sclavitud y e impacto cu esaki tin riba e presente. E dialogo ta dirigi riba e conexion, riba e reconocemento y pa sclavitud haya su lugar den e historia comparti den Reino Hulandes. E comision a traha e rapport ‘Ketenen uit het Verleden’ den cual nan a formula algun recomendacion pa Estado Hulandes, entre otro, reconoce y ofrece disculpa pa e pasado di sclavitud den Reino Hulandes. E disculpa lo yuda pa cura herida historico y ta yuda pa por traha hunto na un futuro comparti. E intencion no ta pa culpa un hende, sino pa Estado Hulandes reconoce e dolor cu sclavitud a causa y pa asumi responsabilidad den e relacion cu otro den Reino Hulandes.

 

Ta importante pa conoce nos historia

Como Arubiano e ta masha importante pa nos conoce nos pasado, ya cu e conocemento aki ta necesario pa nos compronde e presente y e ta yuda nos fiha unda nos kier bay den futuro como hende y como Pais. Sclavitud a forma parti tambe di nos pasado y pesey ta importante pa nos conoce e storianan pa nos evita cu nan por ripiti den nos presente y futuro. Den e tempo nos dilanti Ministerio di Cultura lo dedica atencion y brinda informacion riba e parti di e historia aki di nos Pais.

 

 

FIN

2022JUN30-01