Oranjestad, Aruba: Cu menasa di tormenta tropical Bonnie pa Aruba durante di e proximo oranan, Digicel a reconecta tur cliente postpago cu anteriormente tabata desconecta pa motibu di factura atrasa of pagonan no ricibi. CEO di Digicel, Roeland van der Hoeven ta urgi tur hende pa prepara y pa mantene nan famia salvo, bisando; “Nos preocupacion primario ta seguridad di e comunidad Arubano. Den e proximo oranan conectividad y comunicacion continuo ta esencial, ta p’esey mes nos a disidi di reconecta tur cliente.” Digicel ta informa cu ta extende e fecha di pago te cu dialuna dia 4 di july, 2022.
Digicel ta prepara pa e tormenta tropical
Tambe Digicel a activa su plan di contingencia pa sigura cu tur cos ta na lugar p’asina maneha e proximo dianan di e miho manera. Ta nos mision pa tene bo conecta- tur caminda y na tur momento. Nos ta tuma e responsabilidad aki hopi na serio y a bin ta traha nonstop pa sigura cu tur cos ta na su lugar.
Specificamente, Digicel a pasa dor di su ‘check list’ y tur prueba a keda haci na satisfaccion. A hasi mantenimiento na Digicel su infrastructura, tur generator ta na lugar y nos team ta riba ‘stand-by’. Adicionalmente, Digicel a bin ta cordina cu diferente departamento den region conduciendo diferente briefing y manteniendo nos mes na altura di tur desaroyo. Nos team tecnico ta ‘on call’ y cla pa drenta accion si esaki ta nesesario.
CEO di Digicel, Roeland van der Hoeven ta continua bisando; Nos kier tuma e oportunidad aki pa corda tur hende pa tuma e pasonan nesesario pa mantene nan mes salvo y prepara pa e tormenta. Almacena cuminda basico, segura nan cas y e area rond di cas, recarga bo telefon celular di Digicel cu suficiente credito pa yamada di manera cu bo por mantene contacto cu bo sernan queri.”