Home » Parlamentario Setty Christiaans-Yarzagaray (MEP):  E ley di LNT ta pa trece nivelacion den sistema salarial

Parlamentario Setty Christiaans-Yarzagaray (MEP):  E ley di LNT ta pa trece nivelacion den sistema salarial

by Admin
0 comment 79 views

 

 

Parlamento di Aruba a trata e ley “Normering Topinkomen” (LNT) unda cu ayera esaki a wordo aproba. Un ley cu ta regarda institutonan semi-gubernamental y tin como meta principal di crea instrumento pa introduci norma legitimo na e sistema di bezoldiging introduciendo un maximo pa esanan den top. A introduci un norma maximo cu sistema salarial por yega cu ta representa 130% di salario di un Minister President di Pais Aruba saliendo for di e punto di bista di e cargo y grado di responsabilidad di e funcion aki. Mas facil bisa, e ley aki ta pa trece nivelacion of normalisacion den sistema salarial mas structura den institutonan semi-gubernamental. Final di dia, di un forma of otro e placa cu cada compania ta ricibi of genera pa opera ta bin di pueblo y Gobierno ta of subsidea e instancia of ta accionista di e instituto. 

 

Aparato publico tin su cuadro salarial desde existencia di pais Aruba cu ta e “Bezoldigingsregeling Aruba 1986” cu ta uza un sistema di schalering. Salario di tanto Minsiternan como miembronan di Parlamento tambe ta stipula segun ley cu ta “voorzieningen politieke ambtsdragers” cu ta bisa cu miembronan di Parlamento tin un bezoldiging di 10,865 pa luna y ministernan ta 15,010 pa luna ademas di indica kico por aplica como toelage cu tambe a tene cuenta cu ne momento di calcula e maximo pa e ley di LNT. 

 

Salarionan den e top di algun instituto semi-gubernamental e crece exponencialmente cu tempo y sigur desde existencia di pais Aruba pa awor pa un of otro motibo. E crecementonan ta parce wildgroei y algun desproporcional en comparacion cu un minister president cu ta a cargo maximo di pais. No tin bon idea di structuranan salarial di institutonan. Aunke segun e comision institui pa Gobierno di Corporate Governance pa duna conseho a señala cu tin salarionan di institutonan semi-gubernamental ta surpasa 650,000 pa aña siendo di Minister President segun informacion den e ley ta indica di ta yega casi 253,000 pa aña. 

 

Parlamento a sinta cu diferente di e instancianan aki prome cu tratamento di e ley di LNT pa asina scucha nan preocupacionnan y feedback pa por duna miho aporte na e ley finalmente. Sinceramente a scucha hopi di diferente di instancianan pero den concreto no a ricibi ningun informacion concreot, cifra y tampoco documento di e structura salarial cu Parlamento mester pa por haci miho uzo di e derecho como miembro di Parlamento pa trece cambio y introduci mocionnan pa cu ley aki. Asina mes a inventarisa preocupacionnan cu a wordo formula mas cu por den forma di mocion y amienda teniendo debido cuenta cu nan. 

 

E nivel di salario maximo tawata basa riba salario aplicando e recorte di 25% di Minister President di Aruba cual no tawata aceptabel ni pa fraccion di MEP pues a introduci e cambio aki den un amienda. Tambe den e amienda a haci cambio na e termino di tempo cu e ley aki mester wordo realisa. Aki a cambi’e di 2 aña pa 5 aña unda e prome dos añanan nada no ta cambia (respeit periode) pero na e di tercer aña lo cuminsa gradualmente cu recorte.      Preocupacion si e efecto di haci cambio na e salario den top por resulta cu salarionan di esnan cu ta cay mas bou di top tambe lo mester wordo adapta den e ley mes ta splica cu esaki no ta e caso. Pero di parti di Parlamento a keda e duda ki gap tin anto entre esnan den top di e institutonan y esnan den funcion siguiente pero no por a haya un bista real di esakinan.

 

Tambe a surgi e preocupacion si door di introduci un maximo salario na top por tin efecto salarial riba profesionalnan den funcionnan cu cierto profesionalismo specifico cu e chens cu lo por perde e profesionalnan aki of e peliger cu no por adkiri profesionalnan mirando e nivel di salario cu e efecto cu e calidad di servicio of trabou di e institutonan por baha. Aki por bisa cu mirando cu e top slario a wordo stipula door di amienda introduci na 329,000 florin esaki por significa un salario mensual di entre 23,000 y 27,000 pa luna, cu esaki lo no tin e efecto aki mas.

 

Diferente instancia a pidi pa cay den excepcion, mirando cu tin un articulo den ley riba esaki. Aki por bisa cu di banda di fraccion di MEP sosteni pa RAIZ a introduci un mocion pa urgi gobierno haci estudio di mercado similar cu Aruba pa dertermina si tin instancia un funcion en particular cu por ricibi excepcion pa cu ley aki. Esakinan porta pa motibonan posicion di concurencia cu e instancia por tin y pa evita “brain-drain”.

 

Finalmente mester remarca tambe cu apesar cu Gobierno tawata trahando riba e ley prome cu pandemia, cu den e momentonan mas dificil pa Aruba mirando e crisis di Covid y e situacion financiero precario causa door di gabinete di Eman I y II, Aruba mester a pidi asistencia di Hulanda pa yuda sostene pueblo, Hulanda a pone e ley aki como condicion pa ricibi asistencia financiero. Mas ainda, awor cu ta yegando tempo pa pone un paro na recorte salarial di sector publico door e pandemia como parti di solidaridad, Hulanda a condiciona aprobacion di e ley di LNT pa asina por cuminsa debolbe salarionan bek na trahadornan publico cu 5%.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio