Home Politics Parlamentario Ricky Hoek (MEP):  Mi ta para pa un pais caminda...

Parlamentario Ricky Hoek (MEP):  Mi ta para pa un pais caminda husticia social ta prevalence

SHARE

 

 

Tanto riba dialuna 27 y diamars 28 di juni, Parlamento di Aruba a trata e concepto di ley di ‘Landsverordening Normering Topinkomens’ (LNT). Un ley cu ta trata e normacion di salario di director y managernan di nos companianan publico y semi publico. 

 

Durante di e reunion publico mi a inicia mi discurso cuminsando cu e proceso y factornan cu a conduci na e situacion di awe. Door di e pandemia cu a pone un peso grandi riba nos economia y nos pueblo tabata sin trabou y sin entrada nos mester a acerca Hulanda pa sosten financiero. Esaki no a bin sin su exigencianan. Hulanda a tuma nota di e proceso tumando lugar pa yega na un ley di LNT y a dicidi di pone como un condicion pa Aruba haya sosten di likides y adicionalmente awor ta pone tambe como condicion pa Gobierno por paga bek e 5% di salario di ambtenaar y semi-ambtenaar. Na november 2021 e ley a yega parlamento y e proceso parlamentario a inicia.

 

Otro aspecto cu mi a trata ta e parti di husticia social. Un tema cu mi ta haya hopi al caso y relevante pa cu e ley aki. Dicon? Pasobra mi ta para pa un pais caminda husticia social ta y tin cu prevalence. Pero kico ta husticia social? Husticia social ta un di e balornan social mas importante den nos sociedad cu ta promove e respet igualitario di e derecho- y obligacionnan di cada ser humano den un sociedad. Alabes husticia social ta enfoca generalmente riba e reparticion husto y equitativo di e biennan y servicionan basico pa e desaroyo di un persona, entre otro educacion, salud y labor. Den esaki Parlamento di Aruba ta hunga un rol hopi crucial.

Nos ta co-responsabel pa haci husticia social bira realidad. 

 

Mi a trata e ley a base di 3 nivel di husticia social, esta:

  • Nivel di e topinkomers: nos mester keda husto, honesto y responsabel pa cada decision cu nos tuma. Nos no por perhudica nos directornan cu un decision tuma a base di un solo perspectiva. Nos a haci debidamente nos ronda di consulta y a haci uzo di nos derecho di presenta un amienda pa trece e cambionan cu sigur nos a haya cu tabata necesario. Entre otro a cambia e añanan di transicion, di 2 pa 5 aña, caminda ta tene cuenta cu e aspecto cu e transicion mester ta uno husto y no abrupto. 
  • Nivel di trahadonan: e husticia social laboral ta para tanto pa e relacion saludabel entre e trahado y director/hefe, como e condicionnan fisico y psicologico necesario pa e empleado por eherce su funcion adecuadamente. Pa dicho motibo a ahusta e proposicion cu a keda haci door di gobierno pa loke ta trata e salario maximo. Caminda a mantene e salario di Minister Presidente sin e recorte di 25%. Na mes momento nos a percura mediante di un mocion pa instrui Gobierno pa percura pa preveni e trickle down effect cu hopi di e stakeholdernan a indica na nos. Pasobra nos ta enfatisa na tur momento cu e ley aki ta conta solamente pa esnan den top y na ningun momento esnan abou den e organisacion mester keda afecta pa esaki.
  • Nivel di sociedad: caminda ta considera e tema di pobresa riba nos isla. E ora nos ta papia di husticia social economico, caminda ta regula cu e distribucion di rikeza ta pidi pa un estado di equidad, cu no ta keda acumula solamente pa algun so, ya cu e ta crea y tin como consecuencia un disparidad (espacio) extremo di clasenan social, cu ta conduci entre otro na inhusticia social. Aki mi a toca e realidad existente cu den top di nos companianan semi-publico ta existi contractnan cu durante añanan a pasa e nivel di loke ta acceptabel. Salarionan cu ta 2, 3, 4 biaha mas hopi cu nos Minister President. Sin papia mes di bonusnan y otro beneficionan secundario exahera. Cual sigur no ta hustificabel. Algo cu pa hopi tempo a papia di dje, pero awor ta bay keda atende. 

 

Nos Fraccion ta para pa e ley aki, a percura pa cambionan necesario mediante un amienda, a presenta 3 mocion pa duna atencion na e preocupacionnan cu mayoria stakeholder a presenta y a instrui Gobierno pa den dos aña di tempo pa percura pa e estudionan necesario encuanto di e posibel efecto di tricke down y brain drain. Alabes a enfatisa cu mester bin cu un lista di criteria pa por duna exoneracion si esaki ta necesario.