Home Local DOW- Caso na Pos Chikito

DOW- Caso na Pos Chikito

SHARE

A tuma nota di hopi comentario riba red nan social pa cu e evento cu a tuma lugar ayera na Pos Chikito.
DOW kier a aclarea por medio di e comunicado aki lo siguiente.

Pos Chikito pa añanan largo ta riba lista di calamidad como un area di inundacion durante yobidanan fuerte causa door di tormenta nan tropical.
Esaki por causa hopi molester den e bario y cu riesgo grandi cu cas y curanan por yena cu awa.

DOW ta mitiga e riesgo aki pa e bario door di utilisa y maneha e tereno patras di Rey Hing cu ta un pasada di awa y ta contene un gulido cu ta colecta awa di yobida. For di e punto mas abao den e area aki, esta e gulido, DOW ta pone un equipo pa pomp e awa hiba esaki na e saliña y bakprofiel parti pabao pa por maneha e nivel di awa pa no molestia e cas nan den vecindario.

Desde algun tempo atras a constata un construccion ta tumando lugar riba e tereno patras di Rey Hing. E construccion aki ta den e pasada di awa cual ta reduci e capacidad di colecta e awa.
DOW a combersa pa un tempo largo cu e usuario di e tereno aki pa e stop di haci uzo di e tereno y ruim op loke a wordo construi riba e tereno. E usuario a opta pa no haci caso di esaki y a continua cu su actividad.

Considerando cu a implementa un tropical storm warning y ta premira un cantidad substancial di awacero den e bario di Pos Chikito cu ta categorisa como un area di inundacion a tuma decision den interes general pa tuma medida pa por mitiga e riesgo di inundacion di cas y cura nan.
E trabaonan lo tuma lugar den dos fase esta:
– Fase 1, habri un strook di 6 meter pa e awa por pasa y yega na e gulido;
– Fase 2, caba di ontruim e tereno completo pa restablece e area como pasada di awa.

E meta y motibonan di fase 1 riba termino corto, esta pa 29 juni, ta como lo siguiente:
1. Crea un pasada di awa di 6 meter pa e awa por yega na gulido;
2. Duna aceso na DOW pa por yega pa por pone y opera su pomp for di e gulido pa por controla e nivel di awa;
3. Asina minimalisa e riesgonan cu e casnan de vecindario wordo inunda;

Por ultimo mester menciona cu e usuario no tabata dispone di un permiso pa haci uzo di e tereno aki for di DIP y tampoco ta dispone di un permiso di construccion pa loke e tin traha.

Nos ta spera cu esaki nos por a informa comunidad di Aruba riba e evento cu a sosode ayera na Pos Chikito.