ORANJESTAD: Siman pasa Minister Endy Croes hunto cu colega Prome Minister Evelyn Wever – Croes tabata di bishita na Scol Soeur Juliette, antes Emma School. Na e ocasion special a presencia cambio di nomber di e scol como tambe a para keto y reflexiona riba tur loke e scol a brinda durante su añanan di existencia y tur loke e scol, maestronan y alumnonan a logra.
Durante e ceremonia di desvelacion di e logo nobo Minister Endy Croes a hiba palabra unda cu a enfatisa cu ta su deber pa duna sosten na e alumnonan como tambe sosten na Enseñansa. E mandatario a sigui bisa cu inclusion ta nos pasion y vision di Gabinete Wever- Croes II. Mas cu claro e mandatario ta para tras di e palabra aki y ta brinda oportunidad na e alumnonan pa asina preparanan pa por forma parti di nos sociedad. Manera a wordo bisa scol ta e fundeshi y por haya un trabou den futuro. E scol por conta cu sosten di Gobierno di Aruba aunke den retonan hopi grandi cu tin cu ta conoci, pero esaki ta un grupo cu sigur lo haya atencion no solamente den e parti di recurso humano pero tambe nos promesa ta cu lo drecha e coriente na e scol y pa den futuro cercano por haya airco. Durante e ceremonia e mandatarionan a presenta un reconocemento na e dos atletanan cu logra medaya olimpico. Como tambe a reconoce cabesante di e scol sra. Jocelyne Jacobs cu a cumpli 40 aña den Enseñansa y sra. Lilian Gil cu ta cumpli 40 aña den servicio y casi 20 aña caba dunando les na e scol.
Pa finalisa Minister Endy Croes a enfatisa; sinti boso orguyoso, cada un di e docentenan, cada un di e alumnonan cu e logo nobo. Carga esaki cu orguyo paso Soeur Juliette manera Minister Presidente Evelyn Wever – Croes a ta un hende cu a scoge pa e parti religioso, e la scoge pa balor y normanan y educa nos den esaki y sigur esaki ta un rumbo nos ta aprecia y ta tene na dje. Masha pabien na cabesante, docentenan na tur alumno cu e bunita logo aki, danki pa un mainta asina placentero.
