Home Local Avondmavo brindando oportunidad pa logra Mavo-diploma.

Avondmavo brindando oportunidad pa logra Mavo-diploma.

SHARE

Durante aña escolar 2021-2022 Avondmavo tabata tin 10 alumno cu a logra bula di klas 2 pa klas 3 via di nan Fast-track traject. E Fast-track traject di Avondmavo ta brinda e alumnonan cu tin bon cifra den periodo 1 e oportunidad pa bula inmediatamente di klas 2 pa klas 3 durante e mesun aña escolar. Esaki ta haci cu e cantidad di aña cu e alumno tin mester pa logra su Mavo-diploma ta baha di 3 pa 2.
Avondmavo ta hopi contento y orguyoso cu e resultado di tur nan alumnonan di Fast-track. Despues cu nan a traha un aña duro nan tur a logra di bay over pa klas 4 cu ta nan aña di examen.
Sigur un bunita sorpresa ta cu un di e alumnonan di Fast-Track a logra sali e alumno cu miho cifra den klas 3. Avondmavo no kier keda sin menciona su nomber ya cu e alumno aki a logra di drenta Avondmavo cu un instaptoets, logra bula di klas 2 pa 3 via Fast-track traject y despues logra sali e alumno cu miho cifra den klas 3. Avondmavo ta manda un pabien grandi na Byron Lesire y su famia. Byron ta un hoben cu no ta laga su retonan strob’e. Siendo un persona cu autismo e no tin e tur ora facil pero esaki no ta strob’e di bay padilanti y di ta un ehempel pa tur cu conoce. Den Hulandes tin un dicho; ’Waar er een wil is, is er een weg’ y sigur esaki ta aplicabel pa Byron y hopi di e alumnonan na Avondmavo.

Den examenklas Avondmavo tin un total di 57 alumno cu a logra gradua den tijdvak 1. Dia 1 di juli lo haya sa cuanto alumno mas a logra gradua den tijdvak 2. Avondmavo ta contento cu e resultado y ta felicita cada graduado cu nan logro. Tin tres alumno cu e destaca cu nan cifranan: cu ta e miho graduado di 7 vak, Millie Rodriguez, e miho graduado di 6 vak Johan Dorcas y e miho graduado di online Diana Henao Ramirez . Desde aña escolar 2021-2022 Avondmavo ta brinda un trayecto online pa alumnonan cu no por bin tur anochi fisicamente na scol. Diana ta un di esnan cu a haci uzo di e trayecto aki. Despues di hopi aña sin bin scol el a tuma curashi y a inscribi su mes na Avondmavo. Awe e mama aki di 3 yiu chikito a logra su Mavo-diploma. Hopi pabien Diana; bo a logra!

Aña escolor 2022-2023 ta un oportunidad nobo pa esnan cu kier logra nan Mavo-diploma. Avondmavo ta encurasha tur cu ta cana cu e pensamento pa un dia nan caba nan Mavo, pa nan inscribi. Inscripcion ta bay via di nos website www.avondmavoaruba.com y ta habri te cu dia 7 di juli 2022.

Alumnonan di Mavo-dagschool cu no a logra bay over of logra gradua tambe por inscribi nan mes na Avondmavo. Interesante ta pa alumnonan cu den klas 3 di Mavo-dagschool a keda sinta tin e oportunidad pa bay over na Avondmavo pa klas 4. Pa esaki e alumno cu no a bay over mester scoge un profiel (pakket) cu su cifranan ta voldoende. Pa mas informacion por bishita e website di Avondmavo.