-Diasabra a tuma luga un otro edicion exitoso di e quiz cultural informativo Kibra Coco. E biaha aki Kibra Coco tabata dedica na Dia di San Juan, Dera Gay. Minister Maduro ta gradici Comision Celebracion Dianan Nacional, Grupo di maestro, Setar, Telearuba, Jean Carlo Espinal, Hilyann Croes, Archivo Nacional y Levy Geerman di Povi-tree pa produci y presenta un programa pa siña nos hobennan di nos cultura. Un danki special ta bay na sra. Juliana Rasmijn di SV. Jong San Nicolaas y na sr. Nai Rasmijn di SV. Sportboys pa comparti nan experiencia cu e celebracion den bario. E hobennan di Gucci Dancers Aruba tambe a aporta na e programa deleitando e televidentenan cu nan baile di San Juan.
Minister Maduro ta satisfecho di por wak atras na tres edicion exitoso di Kibra Coco, na unda cu a habri aña cu Kibra Coco dedica na nos Libertador Betico Croes, a sigui cu Kibra Coco Dia di Himno y Bandera y awor ta dedica Kibra Coco na e fiesta cultural di Dia di San Juan, Dera Gay. Cu Kibra Coco kier a haci uzo di un manera mas innovativo pa brinda informacion cultural na e scolnan y via media social logra yega na un publico mas amplio. Minister Maduro ta spera cu scolnan por sigui haci bon uzo di e informacion ricibi y ta gradici cada maestro cu a yuda trece e informacion na e alumnonan di scol preparatorio y primario. Cultura bo tin cu bib’e, y via Kibra Coco nos hobennan por a biba nos cultura.
