Home Local Fundacion Telefon pa Hubentud Aruba ta duna training di e proyecto Prevencion...

Fundacion Telefon pa Hubentud Aruba ta duna training di e proyecto Prevencion di Termento na Scol na profesionalnan di e isla di Saba 

SHARE

 

 

Na e Isla di Saba e comportacion di termento ta halto bao di e muchanan y hobenan. Como resultado di e comportacion aki, a constata un subida den e casonan di mucha/ hoben cu ta comete ‘self-harm’ y/ of ta haya e pensamento pa tuma nan mesun bida. Den cuadro di esaki Openbaar Lichaam Saba a aserka Fundacion Telefon pa Hubentud Aruba pa sostene nan den reduci e comportacion di termento bao di e muchanan y hobenan na Saba. 

 

Termento ta violencia cu ta sosode ora cu un persona ta haci mal uzo di su poder y ta keda ripiti esaki pa haci un otro persona daño. Termento por tuma lugar fisico, verbal, emocional of online. For di 2012 Fundacion Telefon pa Hubentud Aruba a start cu e proyecto Prevencion di Termento na Scol na Aruba. Prevencion di Termento na Scol ta un proyecto cu a ser desaroya basa ariba resultado di estudio di e profesor na Universidad di Bergen, Norway, Dan Olweus. Profesor Dan  Olweus tawata reconoci como e pionero den estudio tocante termento. 

 

Primeramente Oficina Central di Estadistica di Aruba a haci un estudio na Aruba bao di muchanan pa mira con e conducta di termento ta bao di nos muchanan. Despues di esey Fundacion Telefon pa Hubentud Aruba a drenta den scolnan cu e proyecto y a cuminsa cu implementa e proyecto. Despues di a implementa e proyecto pa 5 siman, Oficina Central di Estadistica di Aruba a bolbe drenta e scolnan y midi e comportacion. E resultado a mustra cu e conducta di termento a reduci cu 21 porciento. Un aña despues atrobe Oficina Central di Estadistica di Aruba a midi e comportacion y por a mira cu ela sigun desminui. Scolnan preparatorio, basico, special y secundario a ricibi e training aki. Actualmente tin 34 scol na Aruba cu ya caba a ricibi e training tocante Prevencion di Termento na Scol.

 

For di 12 di juni  te cu 23 di juni 2022 Fundacion Telefon pa Hubentud Aruba a duna 4 grupo di profesional den e sector di enseñansa y veld social e training di Prevencion di Termento na Scol. Cada grupo a consisti di 11 profesional. Durante e training nan a haya conocemento di kiko termento ta ensera, nan a siña implementa e projecto y a traha ariba nan anti-pest protocol. Tambe tawatatin un grupo di mayor cu a sigui e training pa asina nan por ricibi tur informacion cu mayornan por haci uzo di dje pa asina aki trata cu e mucha/ hoben cu ta ter of ta wordo ge-ter na cas.  

 

E training di Prevencion di Termento na Scol na e profesionalnan di Saba ta den cuadro di e ‘kenniscentrum’ di Fundacion Telefon pa Hubentud Aruba cu ta exportando conocimiento. Como un ‘Kenniscentrum’ Fundacion Telefon pa Hubentud Aruba ta exportanando conocimiento na organisacionan gubernamental y no-gubernamental den region. Banda di crea conocimiento y comparti conocimiento, awor Fundacion Telefon pa Hubentud Aruba como un ‘Kenniscentrum’ ta bai sigui exporta conocimento.

Pa mas informacion tocante di e training di Prevencion di Termento na Scol por tuma contacto cu Fundacion Telefon pa Hubentud Aruba via nos facebook: https://www.facebook.com/telefon.hubentud/, email: telhubentud@gmail.com of telefon 5886138/ 5884011.