Home Local DEZHI BUSCANDO COMPANIANAN DEN SECTOR PROMETEDOR

DEZHI BUSCANDO COMPANIANAN DEN SECTOR PROMETEDOR

SHARE

 

 

Oranjestad – Como parti di e iniciativanan di promocion di inversion di Aruba, Departamento di Asuntonan Economico, Comercio y Industria (DEZHI) ta buscando empresanan den e sectornan prometedor di Aruba pa duna testimonio riba e website di Aruba Investment Agency (ARINA). Companianan cu ta estableci aki na Aruba y ta interesa pa comparti con nan a yega na exito riba nos isla, por tuma contacto cu DEZHI.

 

Website nobo

ARINA ta preparando pa lansa su website pa sigui na desaroya y promove mas inversion internacional pa Aruba den e sectornan prometedor. ARINA lo lansa un identidad y imagen totalmente nobo hunto cu un campaña internacional cu ta refleha cu Aruba ta mas cu solamente turismo. Pa cu esaki, ARINA kier promove companianan local exitoso den sectornan prometedor pa asina atrae inversionistanan internacional pa crea un economia mas sostenibel pa nos pais Aruba. E sectornan prometedor ta entre otro, agricultura, industria creativo, logistica, economia circular, turismo medicinal y economia di conocemento.

 

Tocante ARINA

Aruba Investment Agency (ARINA), un organisacion bao guia di Departamento di Asuntonan Economico, Comercio y Industria di Aruba (DEZHI), ta e agencia di inversion di gobierno encarga pa promove y facilita inversion na Aruba. ARINA su vision ta pa stimula un economia mas fuerte, innovativo, resistente y diversifica, cual na su turno ta contribui na un calidad di bida mas halto pa e comunidad di Aruba. E obhetivonan principal di e vision di ARINA ta pa 

yuda stimula un crecemento economico sostenibel, creando empleo, competencia husto y facilidad di haci negoshi den e sectornan prometedor. ARINA ta yuda inversionistanan den diferente etapa di haci negoshi, entre otro pa yuda nan establece y expande nan actividad comercial na Aruba.

Pa mas informacion of pregunta? 

Tuma contacto cu Zuleika Quant na DEZHI via email z.quant@deaci.aw.