ORANJESTAD – Awe mainta te den oranan di atardi a caba cu tratamento di e caso penal cu Ministerio Publico a cuminsa contra e duo di 17 aña, Izak Principaal y Zuriel Celaire. Tabatin medida di seguridad.
Tratamento di e caso aki a cuminsa na Februari 2022 y awor, despues cu a haya raport di Reclasering, psycologo y psychiater, a sigui cu e tratamento. Fiscal a cuestiona tur dos sospechoso pa e serie di delitonan cu nan a haci. Esun mas pisa tabata e lamentable caso di tira Shayuri mata. Fiscal a exigi pa tratamento obligatorio pa Zuriel, cual por dura te cu 6 aña. Esaki pasobra Zuriel den un carta manda pa Hues a bisa cu e kier cambia su bida y kier ayudo. Fiscal a usa ley di adulto, envez di ley hubenil pa Izak. El a exigi 11 aña di prison y despues Izak lo por bay sigui tratamento
ACUSACIONNAN
Zuriel y Izak tin diferente casonan penal contra nan. Fiscal a menciona cu Izak ta wordo acusa cu riba 30 Augustus 2019 a menaza 2 empleado di OC cu bate.
Zuriel ta wordo acusa cu riba 10 Januari 2020 a haci violencia publico door di tira e homber d M. cu piedra y bay riba dje cu un cuchiu.
Zuriel tambe ta wordo acusa cu riba 14 Februari 2020 el a bay riba e homber H. cu un cuchiu y menace.
Izak ta wordo acusa cu riba 30 December 2020 el a menaza su mama y ruman muher. El a menaza di kima e cas. Tambe el a kibra porta y cashinan den e cas. Tambe el a wordo haya cu un cantidad di marihuana.
Izak y Zuriel ta wordo acusa cu riba 22 di Mei 2021 a haci un asalto arma hunto cu otro riba e hombernan T. y C. Nan tabata arma cu cuchiu, bate di baseball.
Izak y Zuriel ta wordo acusa cu riba e anochi di 29 pa 30 Mei 2021 a purba di mata 4 persona den un drive by shooting dilanti American Bar. Nan a tira diferente biaha caminda W., G., d l C. y R. a resulta herida. Tambe nan ta wordo acusa di posecion di un arma di candela.
Izak y Zuriel ta wordo acusa cu riba 4 Juni 2021 a tira mata Shayuri Petronia (19). Izak tabata esun cu a tira mientras cu Zuriel tambe tabata presente.
RAPORT PSYCHIATER
Hues a bisa cu Diahuebs e raport di psychiater a keda cla y abogadonan a haya esaki. Hues a bisa cu tin raport di Reclasering, spycologo y psychiater. E raport di psycologo riba Zuriel ta mustra cu Zuriel tin limitacion den pensamento y por wordo influencia. E no ta compronde kico ta bon of malo. E no ta siña di loke a pasa den pasado. Psycologo ta haya cu Zuriel no ta completo responsabel pa loke el a haci. E ta conseha pa aplica castigo hubenil y tratamento obligatorio interna den un institucion pa haya guia.
Raport di psychiater ta mustra cu durante cu Zuriel ta sera den KIA, tin un cambio den comportacion. Psychiater tambe ta haya cu Zuriel no ta completo responsabel pa loke el a haci y cu e mester wordo interna den un institucion.
ZURIEL CU CARTA PA HUES
Hues a mustra cu Zuriel a manda un carta p’e caminda e ta bisa cu e kier cambia su bida pa un mihor. Zuriel ta bisa cu e mester ayudo pa sali for di e bida cu e ta aden. El a bisa cu e tabata un victima di bully na school y pesey el a dicidi di no bay school mas. El a bay den mal caminda. Awor den KIA su mente habri cu e mester cambia su bida. E kier bay Hulanda pa cambia su bida y cu guia pa bay dilanti.
IZAK TA RESPONSABEL
Hues ta mustra cu for di e raportnan di Reclasering, psycologo y psychiater di Izak por compronde cu Izak, mescos cu Zuriel, a lanta den un famia kibra. Izak desde su 11 aָña ta humando marihuana y desde su 8 aña e ta bao tratamento di psychiater biba serca su abuelo. Reclasering ta mustra cu Izak tambe ta bin di famia kibra. Hubentud dramatico. Maltrata door di mama y abuelo. Saca for di caso cu 16 anja. Bay keda serca abuelo banda di tata. No a sigui bay school. Izak usa marihuana desde 11 anja. Desde 8 anja bay psychiater pa tratamento. Ta asina cu e kier bay serca su tata na Hulanda.
Psycolog ta haya cu Izak tin problema di comportacion anti social y ta hopi dificil pa atene su mes na reglanan. E no ta mustra di tin duele di loke el a haci. Psycologo no ta haya Izak completo responsabel pa loke el a haci.
Psychiater ta mustra cu e no a mira cambio den comportacion di Izak den KIA. E mester stop di usa marihuana y guia den Reclasering. Psychiater ta haya Izak responsabel pa su actonan. Ta Izak mes a percura pa tin un arma.
FISCAL
Fiscal a bisa Hues cu e ta haya proba cu Izak a menaza trahadornan di OC cu un pida palo riba 30 Augustus 2019. Tambe cu Izak a menaza su mama cu morto y haya Izak cu 17,9 gram di marihuana. Fiscal tambe ta haya proba cu Izak a menaza di kima e cas. A hay’e cu un sker.
E asalto arma 22 Mei 2021 di homber T. y e homber C. na su cas. Un grupo di 5 homber. Nan a bati’e y bay cu e auto. Izak arma cu machete y Zuriel cu bate di baseball. Tambe nan tabata den posecion di un arma di candela.
Ariba e anochi di 29 pa 30 Mei 2021, Izak y Zuriel a haci un drive by shooting na American Bar. E personanan W. a sufri herida di tiro den man y G. na pia tira. E personan R. y H. tambe a resulta herida. Nan tabata para dilanti e bar y a scucha tiro y nan resulta herida. Tin testigo a mira Izak y Zuriel den auto Nissan. Imagen di video di seguridad ta mustra e auto pasa y tira.
Fiscal ta haya cu aki ta 4 biaha intento di asesinato. El a bisa cu tira cu arma riba distancia cortico riba un grupo di hende ta core risico cu hendenan por muri. El a mustra cu Zuriel y Izak a bay busca e arma despues di a pasa dilanti American Bar y a bay tira.
Asesinato di e dama Shayuri (19) riba 4 Juni 2021. Fiscal a bisa cu Shayuri a worde tira mata door di Izak. E ta haya Izak responsible di morto di Shayuri. For di investigacion por conclui cu e victima tabata para y tiro a alcanza den cabez. El a bisa cu tin diferente declaracion di e sospechosonan cu ta mustra cu accidental a tira. Fiscal a bisa cu e no ta kere esaki.
El a mustra cu Zuriel ta bisa cu Shayuri a bisa Izak varios biaha pa no dirigi e arma riba dje. Diripiente un tiro a los den cabez. Izak a bisa cu el a kere cu e arma no tabatin bala y a bay haci un chansa pone arma riba Shayuri y tiro los. Despues ta bisa cu el a bay controla si e arma tin bala y ora el a hala e parti di loop atras, un tiro a los. Tambe tin declaracion cu lo tabatin un discusion entre Izak y Shayuri y Shayuri a core y tiro a cay.
Segun Fiscal, ta ser bisa cu nan tabata bou influencia di droga. Esey na opinion di Fiscal, no ta considera un excusa. El a bisa cu loke ta papia di accidental, e no ta kere. El a bisa cu Izak lo a declara cu ta sospecha Shayuri lo a papia riba e y Zuriel na nan enemigo pa elimina nan. Fiscal a bisa cu Zuriel tambe ta papia cu e tin sospecho cu Shayuri lo a reda nan na nan enemigo.
Fiscal a bisa cu no tin prueba pa bisa cu ta intencional a tira Shayuri mata. Tampoco no tin nada di cu Izak lo tabata sinta riba un stoel cu un pia tabata kibra. Tur dos sospechoso ta bisa cu Izak tabatin e arma poni riba Sharury.
CASTIGO
Fiscal ta haya Izak Principaal y Zuriel Celaire culpable di tur e acusacionnan. Ambos tabatin 17 aña ora di incidentenan pero Hues, teniendo cuenta cu circumstancia por aplica ley di adulto y no castigo hubenil. El a menciona diferente sentencia di Corte di Hulanda caminda a haci esaki den entre otro caso di asesinato. El a bisa cu e mucha a haya castigo di adulto mirando su comportacion.
Fiscal a bisa cu Izak y Zuriel tin casonan hopi serio di asalto cu violencia, e drive by shooting caminda a herida 4 persona y e tira mata di Shayuri. El a mustra cu psychiater ta avisa pa aplica castigo adulto pa Izak Principaal. Fiscal ta haya cu en principio e castigo hubenil no ta haci husticia pa tanto Izual comom Zuriel. Pero den Zuriel ta mira algo otro. E ta mustra cu e kier cambia. El a bisa cu e meta di castigo ta pa proteha comunidad y evita cu e acusado ta ripiti loke el a haci. Tambe ta ofrece guia pa yuda e acusado.
Fiscal ta haya cu tratamento obligatorio lo por ta ideal. El a exigi pa Zuriel Celaire tratamento obligatorio cu por dura 6 aña sera den un institucion. Pa Izak Principaal ta otro. Fiscal a bisa cu mirando e seriedad di caso mester exigi castigo di prison y despues tratamento obligatorio. El a exigi 11 aña di prison pa Izak y despues tratamento obligatorio.
Dia 15 July 2022 lo tin sentencia.