Home » Minister di Cultura Xiomara Maduro na presentacion escolar “Fiesta di Dia di San Juan – Dera Gay 2022 na Cas di Cultura”

Minister di Cultura Xiomara Maduro na presentacion escolar “Fiesta di Dia di San Juan – Dera Gay 2022 na Cas di Cultura”

by Admin
0 comment 58 views

 

 

-Diaranzon mainta Minister di Cultura a asisti na Cas di Cultura pa e presentacion escolar prepara pa Departamento di Cultura pa nos muchanan di scolnan preparatorio y scolnan basico klas 1 te cu 3. E presentacion tabata uno informativo y educativo di e fiesta di Dia di San Juan – Dera Gay. 

E mainta a inicia cu palabra di bon bini na Minister di Cultura Xiomara Maduro, muchanan di scol y docentenan. E prome presentacion tabata di Grupo Cakiña, forma pa musiconan di Departamento di Cultura y amigonan musico kendenan a presenta algun pieza tipico y a sigui acompaña e diferente presentacionnan. Minister di Cultura a wordo invita pa baila un wals. A sigui cu presentacion di Cuerpo di Bombero, Sr. Francis Toussaint kende a splica locual mester tene na cuenta ora cu ta sende candela. A duna algun tips, mirando cu riba Dia di San Juan, e cuerpo ta man yen di trabao. Aunke mester bisa si cu aña pasa e cantidad di candela a bira menos y nan ta spera cu e aña aki e por keda bira menos. 

E presentacion a sigui caminda a invita dos docente riba scenario y a dunanan un splicacion di e baile di Dia di San Juan y despues e docentenan a presenta loke nan a siña na esnan presente. A invita un paar di mucha pa nan tambe por presenta e baile di Dia di San Juan. A sigui cu e wega di baile di rancamento di bandera y e grito di galiña y di gay cual e muchanan tambe a participa y esnan cu a gana a ricibi un certificado. E presencia di gay Chogogo a trece un extra ambiente den Cas di Cultura.

Minister Xiomara Maduro a keda masha contento y a goza di e presentacion hunto cu e muchanan di scol y docentenan. E mandatario a gradici e scolnan pa ta presente y particularmente Departamento di Cultura pa prepara y presenta e bunita mainta informativo, educativo y yen di ambiente di e fiesta di cosecha Dia di San Juan cu ta wordo celebra dia 24 di juni proximo.

Minister Xiomara Maduro cu cooperacion di Departamento di Cultura a entrega e scolnan “E caha sabi” cual ta contene diferente folder cu ta splica e origen con pa celebra e fiesta di Dia di San Juan, e buki di Wantomba y e fiesta di Dia di San Juan, un USB cu musicanan di Dia di San Juan. Pa e scol por celebra e Fiesta di Cosecha, Dia di San Juan – Dera Gay, tambe e scolnan a ricibi pa e baile un bandana preto pa mara e wowo, e palo pa mata e gay y un calbas.  E presentacion escolar a wordo haci pa un cantidad di scol caminda mas di 5 mil mucha a participa y wordo educa riba nos fiesta tradicional di consecha Dia di San Juan, Dera Gay.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio