Ministerio di Cultura cu video Conscientisacion Celebracion Dia di San Juan – Dera Gay
-Minister di Cultura ta gradici Bureau City Inspector tambe pa nan cooperacion pa participa den e video di conscientisacion Celebracion Dia di San Juan – Dera Gay y ta comparti cu comunidad e conseho di Bureau City Inspectie. Sr. Larmonie den e video ta trece algun conseho pa comunidad tene na cuenta ora di prepara un candela pa celebracion pa Dia di San Juan.
- Scoge un lugar apropia den aire liber cu por lo menos 100 meter di distancia di cualkier edificio, cas of cualkier structura existente cu por capta un vlam y eventualmente pega na candela.
- Midi un circulo cu un diameter di no mas cu 5 meter pa e keda na un tamaño controlabel. Ta conseha pa stapel den dje tur e material cu lo bay wordo kima cuminsando exactamente meymey di e circulo; e idea ta pa crea un forma manera un “hooiberg” y asina yena ariba dje bin afo pa hasie mas grandi y stabil.
Bureau City Inspector ta conseha pa semper hasi un limpiesa completo rond di e espacio destina pa e candela pa esaki no por “cana” y amplia e candela di un forma indesea. Ademas pa uza solamente materialnan cu ta organico y biologico. Por ehempel; tur tipo di palo, palet, carton pisa, palo, taki, hala di coco y blachinan di mata. Ideal lo ta pa uza e residuo di loke a ser kima como compost den e gordura pa planta, manera nos antepasadonan tabata haci. Nunca usa materialnan toxico y no natural cu ta malo pa salud di hende y cu por causa dañonan serio irecuperabel. Ademas por causa daño ecologico cu lo afecta nos fauna y nos flora. Por ehempel taira di auto y bais, bateria di auto, metalnan, plastic en general, saco di plastic cu ta contene desperdicio di cas, boternan/containernan di plastic di Clorox of Amoniak, cadavernan di animal…etc. Mantene bo mes y tur hende na un distancia sigur for di e candela pa encaso cu esaki cay den otro e no spart ariba niun mirones y tambe pa e huma no afecta e halamento di rosea di tanto hende como bestia.
Sr. Larmonie kier a recorda tur hende cu sushi y candela no ta amigo di otro. Laga nos no haci mal uzo di nos fiestanan cultural pa deshaci di nos desperdicio y sushi en general. Esaki ta castigabel pa ley y ta malo pa un y tur. Bureau City Inspector ta desea pueblo di Aruba un feliz Dia di San Juan, laga nos celebra di un forma consciente y corecto. Ministerio di Cultura lo percura pa e video aki wordo pasa na television y riba medionan social.