Home Corte Caso di 46 baranan di oro intercepta na aeropuerto trata den Corte

Caso di 46 baranan di oro intercepta na aeropuerto trata den Corte

SHARE
Illustration, not the real gold bars

ORANJESTAD – E hombernan Venezolano biba na Aruba, R.G.Z. y J.T.R., ayera mainta a presenta den Corte pa e caso penal cu Ministerio Publico a cuminsa contra nan.

ARUBA NATIVE por a compronde cu R.G.Z. y J.T.R. ta wordo acusa di falsificacion y labamento di placa riba 9 Februari 2018. E caso ta relaciona cu e 46 baranan di oro cu a detene R.G.Z. cun’e na aeropuerto, na momento cu e kier a viaha pa Hulanda.
Fiscal ta haya R.G.Z. y J.T.R. ta culpable di a transporta ilegal 46 baranan di oro cu ta pisa 55 kilo. Fiscal a exigi 12 luna di prison pa J.T.R. di cual 6 luna ta condicional y castigo di prison igual na loke R.G.Z. tabata sera. Tambe el a exigi pa confisca e 46 baranan di oro cu ta hinca den un caha fuerte na Banco Central.

46 BARA DI ORO INTERCEPTA

Hues a cuminsa cu R.G.Z., kende a wordo deteni na aeropuerto cu e 46 baranan di oro cu ta pisa mas o menos 55 kilo. R.G.Z. a bisa cu e 46 baranan di oro tabata den dos maleta pa asina e por mobilsa mas facil. El a bin for di Venezuela cu e maletanan aki. Na Venezuela el a haya e baranan aki for di Douane Venezolano. Dia 8 Februari 2018 el a yega Venezuela. Su siguiente dia el a viaha pa Aruba pa sigui pa Schiphol Hulanda y despues Dubai. El a bisa cu J.T.R. a bis’e pa haci esaki. El a bisa cu diferente biaha el a yega transporta oro for di Aruba – Schiphol – Belgica of Dubai. Esaki tabata promer biaha cu el a bay busca e baranan for di Venezuela. Normal e baranan ta bin den un avion priva for di Venezuela y na Aruba, R.G.Z. ta busca esakinan for di Douane di Aruba, cu tur e documentonan necesario.

R.G.Z. tabata haya for Douane di Aruba, documentonan seya di e oro pa asina e por sigui viaha pa Schiphol y Dubai. Hues a bisa cu e no a mira documentonan di Douane Venezolano den e documentonan cu el a mira.

BARANAN DI ORO SIN DOCUMENTO DI VENEZUELA

Ta asina cu J.T.R. tambe sa haci viahe pa hiba baranan di oro. El a splica Hues con tur cos ta hinca den otro. El a bisa cu e compania Pa Oro International, estableci na Curacao, ta pidi’e cu su compania, pa transporta baranan di oro pa diferente empresa cu ta smelt oro. Pa Oro International ta manda e documentonan pa Douane Aruba pa haya aprobacion. Unavez cu tur cos ta cla, ta haya e baranan di oro na Douane Aruba. E baranan tabata bin den un avion priva for di Venezuela. Segun J.T.R., esaki tabata sosode durante 8 aña largo sin ningun problema, te cu dia 9 Februari 2018. El a splica cu pa e transporte 9 Februari 2018, el a acerca Douane pa mira si tin mester di documentonan extra mirando cu Gobierno Venezolano a prohibi exportacion di koper, silver. Douane Arubano a bisa cu no tin ningun problema y a aproba e documentonan di e baranan di oro. Door cu a para vuelonan priva, mester a usa un vuelo comercial y mester a bay busca e baranan di oro serca Douane Venezolano.

Hues a remarca e ta parce cu e baranan di oro ta yega Aruba sin documentacion di Douane Venezolano. J.T.R. a bisa Hues cu e ta imagina cu e aerolinea cu ta trece e baranan di oro, ta percura pa e documentonan.

Fiscal a remarca, con por ta cu ta transporta asina hopi bara di oro balora na 2 miyon dollar, sin cu tin documentonan, siendo cu e ta castigabel segun ley di Venezuela. J.T.R., a bisa Hues cu si un aerolinea ta bin cu e oronan, e mester a pasa henter e proceso na Douane Venezolano promer cu e avion por sali y bin Aruba.

DOUANE YENA INFORMACION ROBEZ INCONCIENTE

Fiscal a bisa Hues cu 9 Februari 2018, Polis a detene G.R.Z. den aeropuerto cu 55 kilo di oro na momento cu e kier a viaha cu KLM pa Hulanda. El a traha pa J.T.R. kende despues a wordo deteni. J.T.R. tin compania cu ta transporta oro for di Venezuela pa e compania Pa Oro International na Curacao. Fiscal a señala cu for di ningun caminda por mira cu e oro ta procedente di Venezuela. E baranan di oro balora na 2 miyon dollar, ta sali for di Aruba caminda Douane ta pone cu e baranan di oro ta procedente di Aruba. E ta haya cu e informacion riba e documentonan ta falso y Douane Aruba inconciente tabata haci esaki.

TRANSPORTA ORO ILEGAL

Fiscal a mustra cu Januari 2018, Venezuela a prohibi exportacion di koper y silver for Venezuela pa Aruba y Curacao. Esey a pone cu tanto Aruba como Curacao a introduci leynan cu mester tin aprobacion di Banco Central di Venezuela y tambe autorizacion di Banco Central di Venezuela pa exporta baranan di oro. El a bisa cu ningun di e documentonan aki tey hunto cu e 46 baranan di oro. El a mustra cu Venezuela a introduci ley cu castigo di 8 pa 12 aña di prison pa exportacion ilegal di entre otro oro.

LABAMENTO DI PLACA

Fiscal ta haya cu aki tin labamento di placa. E ta haya cu e oro ta for di procedencia criminal. E oro a wordo saca ilegal. A cumpra e oro cu 2 miyon dollar cash. El a bisa cu tin potret di e suma grandi aki, cu lo ta procedente di droga. El a bisa cu ni J.T.R. y G.R.Z. sa di procedencia di e oro. J.T.R. ta transporta oro pa Pa Oro International cu ta envolvi den e transporte ilegal di oro. E compania Oro Azul na Venezuela lo ta e compania cu a bende e oronan. Pa Oro International a cumpra e 55 kilo di oro pa 2 miyon dollar. A investiga na Venezuela y a resulta cu Oro Azul ta un negoshi chikito na Venezuela cu ta bende cosnan chikito.

CASTIGO

Fiscal a exigi pa G.R.Z. castigo di prison igual na loke e tabata sera caba. Pa J.T.R. el a exigi 12 luna di prison di cual 6 luna ta condicional cu 2 aña di prueba. Fiscal tambe a exigi pa confisca e 45 baranan di oro.

Hues awor ta bay studia e caso y dia 14 July 2022 lo tin setencia.