Home Politics FUTURA:  SUPERNOVA GIRLS STEM EXPERIENCE A CONTA CU 125 PARTICIPANTE

FUTURA:  SUPERNOVA GIRLS STEM EXPERIENCE A CONTA CU 125 PARTICIPANTE

SHARE

 

Durante fin di siman, Aruba Futura Foundation, den colaboracion cu ‘Makerpedia’, a organisa un evento como parti di e proyecto ‘Supernova’. E evento titula “Girls STEM Experience” tin e meta pa stimula interes y introduci – den un manera innovativo – mucha muhenan entre 6 – 9 aña na e sectornan y temanan di Ciencia, Tecnologia, Engineria y Matematica (STEM).  Futura Spaces a wordo converti unda cu a separa e localidad den 4 camber cu 4 diferente experiencia, cada camber representando un sector di STEM. E muchanan muhe hoben por a participa den diferente workshops, retonan, y weganan cu a tuma luga diasabra atardi. Tambe e muchanan muhe tabata tin e oportunidad pa explora nan imaginacion den e sectornan aki siñando topico- y abilidadnan nobo den un manera educativo, intercativo, y diferente. E evento aki tabata gratis pa tur cu kier a participa, y por a conta cu un total di mas di 125 participante.

 

Den cada camber, representando cada topico di STEM, tabata tin un profesional femenino cu a duna un workshop. Den e experiencia di ‘Ciencia’, presenta pa Elena Duduk, docente di Cienca na International School of Aruba, e muchanan muhe por a haci uzo di Microscop y haci observacionnan uzando un variedad di materialnan y organismonan ambos “bibo” y “no bibo”. Adicionalmente nan a haya e oportunidad pa completa un experimento trahando cu organismonan cu ta sobrevivi den awa, manera ‘plankton’. 

 

Siguientemente, Richelle Chirino – un STEM enthusiast – a prepara un experiencia di Matematica caminda muchanan muhe a wordo enfrenta cu retonan di- y uzando LEGO,  y tambe a traha obhetonan uzando e arte di origami, y asina splicando e importancia, y cu den mayoria actividad den bo bida diario bo ta haci uzo di Matematica. 

 

Den e camber di Engineria – cu por cierto tabata un Hit entre e muchanan muhe – Tess Montenarello di ‘Makerpedia’ a mustra e muchanan muhe con pa traha un wega di arcade uzando materialnan recicla, por ehempel carton, plastic, cahanan di diferente material, etc. 

 

Finalmente, den e ultimo camber Christie Mettes di Metabolic Foundation a presenta e experiencia di Tecnologia unda cu participantenan a siña con cu obhetonan di bida diario (por ehempel fruta y berduranan) por wordo uza pa hunga weganan riba computer por medio di ‘conductivity’. Tambe e participantenan a siña e arte di fabricacion digital, unda cu a diseña artefactonan, y siña mas di e oportunidadnan y posibilidadnan di 3D printing. 

 

Supernova ta un studio experimental pa mucha muhe y hende muhe unda cu e meta principal ta pa ser femeninonan bini hunto y intercambia ideanan, colabora, inspira otro, y siña habilidadnan nobo. SuperNova ta contribui na- y stimula Igualdad di Genero cu ta meta number 5 di SDG’s, cu ta e Sustainable Development Goals di Nacionnan Uni, y ta percura pa e ser femenino no keda atras. 

 

Futura ta sigui organiza diferente evento y workshop pa mucha- y hendenan muhe di tur edad durante e aña. Pa mas informacion of pa keda up to date riba desaroyonan rond di e proyecto, bishita nan pagina di facebook y instagram @arubafutura. Adicionalmente, si bo ta desea di colabora cu Futura riba cualkier proyecto, contact nan libremente na: hello@futuralab.org.