ORANJESTAD – Dialuna mainta, durante un conferencia di prensa na oficina di Setar Seroe Blanco, Minister di Husticia y Asuntonan Social Sr. Rocco Tjon, a firma e Ministeriële Beschikking (MB) pa otorga na Setar NV e proyecto di camara di siguridad den area hotelero. Esaki den presencia di Director di Setar N.V. Sr. Roland Croes.
Combati criminalidad na diferente manera door di haci uso di tecnologia ta un topico sumamente importante, y ta ancra tambe den e vision y e maneho di parti di Ministerio di Husticia y Asuntonan Social. Segun e mandatario, Setar tawata un escogencia logico pa e proyecto aki, mirando cu den pasado intentonan a wordo haci pa por cristalisa e tipo di proyectonan aki, pero nunca a wordo concretisa por completo. Semper tawata tin cierto retonan pa concretisa un proyecto asina, y ora a wak e “track record” di Setar caminda ya caba a ehecuta tipo di proyectonan asina, exitosamente, pa companianan di magnitud manera Aeropuerto, e decision tawata logico pa bay di acuerdo cu e oferta cu a ricibi di Setar.
E proyecto aki ta uno cu por keda amplia riba dje, y te cu awo lo conta cu un total di tres fase, e prome fase ta e instalacion di e sistema di camara y for di Ministerio di Husticia y Asuntonan Social ta planiando pa fase dos y tres pa asina practicamente na tur localidad strategico na Aruba por tin e camaranan aki instala. Banda di esaki, na comienso di Juli, Ministerio di Husticia y Asuntonan Social lo instala un comision cu ta bay sigui monitorea henter e desaroyo di e proyecto aki, pa motibo cu e proyecto aki lo conta cu un trayecto di seis pa shete luna. Es decir, e comision aki lo keda monitorea e proceso, pa asina percura cu e ehecucion ta uno exitoso. Na mes momento e comison aki hunto cu Setar lo traha hunto, pa asina cu fase un ta completamente ehecuta por sigui mesora pa fase dos y consecuentemente pa fase tres.
Mientras e proyecto aki ta wordo ehecuta, ambos huristanan di Ministerio di Husticia y Asuntonan Social conhuntamente cu huristanan di Setar N.V. lo sigui delibera pa yega na un “service level agreement”, cual ta hopi importante, pa asina garantisa cu e proyecto aki lo por keda haya mantencion, dado caso un camara of un part daña, esaki por wordo reemplasa of drecha mesora.
Pa finalisa, Ministerio di Husticia y Asuntonan Social ta den combersacion cu Ministerio di Turismo y Salubridad Publico, pa un otro parti importante, cual ta e borchinan cu lo bay wordo instala den e area hotelero, pa anuncia cu e area lo ta bou di vigilancia di camara, y na mes momento tambe lo percura pa “infomercials” wordo saca, pa asina conscientisa pueblo di Aruba en general cu e area ta bou di vigilancia. E comision lo keda encarga tambe pa bin cu un proposicion pa asina evalua con e imagennan aki ta bay wordo vigila y con esaki ta bay wordo comparti tambe cu e unidadnan pa despues por reacciona tambe ora cu algo wordo capta riba e camaranan aki. A haci un evaluacion cu otro paisnan den exterior, pa cu e parti di vigilancia di e camaranan, y a opta pa otro organisacionnan of fundacionnan cu tin e autoridad cu ta mara na diferente regla lo bay keda encarga cu esaki, pa di e forma aki por percura cu nos agentenan policial por sigui ehecuta nan core business.
Por ultimo, ta gradici tur trahado di Ministerio di Husticia y Asuntonan Social cu a haci esaki posibel den un tempo relativamente cortico pero tambe e personal di Setar kende a traha hunto cu Ministerio pa percura cu por firma e MB caminda ta aloca tur e fondonan. Esaki ta e prome di hopi proyecto mas pa bin na bienestar di pais Aruba.