Home » Job Awareness Day tabata exitoso Aruba Marriott ta sigui recluta mas asociado 

Job Awareness Day tabata exitoso Aruba Marriott ta sigui recluta mas asociado 

by Admin
0 comment 63 views

 

 

ORANJESTAD, Aruba – Aruba Marriott Resort & Stellaris Casino ta contento di a organisa nan Job Awareness Day e aña aki atrobe. Aña pasa a organis’e pa prome bes y e exito a causa cu mester a bolbe organis’e e aña aki atrobe. Meta di e evento ta pa cera e empleado miho conoci cu tur opcion di trabou den e compania, pa si acaso kier cambia di funcion. Tambe e evento ta sirbi pa asociadonan por recomenda un amigo of famia cu ta buscando trabou, pa trece nan pa join e famia grandi di Marriott.

 

Reuella Reeberg, manager di Human Resources, a splica cu hopi biaha e colega ta traha den su departamento y ta asina druk bezig, cu no sa mes kico otro colega di otro departamento ta haci. Porta tin interes pa un dia crece y join un otro departamento. Esaki tabata e oportunidad, unda cada departamento a setup nan booth y e asociadonan tabatin oportunidad pa bishita y busca tur informacion. Por a haci pregunta directamente n’e supervisor, manager y asina siña conoce e departamento mas di cerca, haya sa kico nan ta haci y asina por describi un pasion den un otro area. 

 

Aña pasa ora a organisa e evento, a nota cuanto asociado, de facto, tabatin un pasion scondi pa un otro funcion den e compania. Despues di esaki tabatin mas di 125 colega cu a transfer of a ricibi un promocion na aña 2021. Kiermen e tabata algo cu kier a ripiti e aña aki den 2022. 

 

Nair Tromp, stagiair di Universidad di Aruba, a conta di su experencia, cu e ta considera fenomenal. Su bista riba e sector hotelero tabata poco limita. E no tabatin hopi conocemento con cos tabata cana. Nan ta hayando les, specialmente e parti teoria, tocante e sector hotelero. Pero compara cu e practica, Tromp ta haya cu e ta un mundo completamente riba su mes.

 

E ta haya cu ta algo great cu ta aplica teoria y practica, e ora por compronde mas miho. E tin masha bon experencia y ta conociendo hopi hende nobo. Tromp a expresa di ta mira un bon futuro na Aruba Marriott, pasobra e ta un organisacion hopi profesional. E hendenan ta tremendo, tin un cultura di servicio excepcional, ambiente di trabou ta hopi bon y Tromp a compara esaki cu tur otro caminda cu el a traha den pasado. E ta recomenda tur hende pa bin traha na Aruba Marriott. 

 

Sharell Croes, un otro stagiair di Universidad di Aruba, a expresa cu si bo ta un persona cu gusta siña, gusta traha cu huesped y dispuesto pa semper siña, e ta recomenda pa bin traha na Aruba Marriott. E ta un experencia maraviyoso como studiante y p’esey e lo kier traha na Marriott ora e caba di studia. E ta recomenda pa drenta Aruba Marriott den un posicion basico, pero cu bo mesun perseverancia, cu bo interes, cu bo interes y disciplina, hopi lihe lo crece. 

 

Yazira Feliciana awendia ta director di mercadeo y slot performance den Stellaris Casino. E ta corda di a drenta den un posicion mas abou pero a haya oportunidad pa siña hopi, crece den e trabou y awe e ta ocupa un puesto den top. Aruba Marriott ta duna hopi oportunidad, ta duna bo tur herment y training pabo bay dilanti. E ta orguyoso di forma parti di un di e companianan cu ainda ta activa su pasion, ainda e ta siña den e compania aki, ainda e ta completamente pasiona pa sigui crece.

 

Jason Bregita, senior assistant director di finansa, tin shete aña trahando vast na Aruba Marriott. Separa di a siña hopi, el a crece como profesional y como hende. Esey ta bin door di e coleganan cu e ta traha cu ne. E mentalidad eynan ta hopi open-minded y progresivo. Nan ta habri pa idea nobo y e ta bisa esey di experencia. Ta un sentimento special cu bo ta sinti di ta n’un luga cu ta balora bo p’e habilidadnan cu bo ta trece.

 

Aruba Marriott tin un programa yama “Bring your friend day”, den cual asociadonan di Marriott por referi un amigo y aplica pa un trabou. Segun Reeberg, den e programa aki Marriott ta compensa e colega cu referi un persona pa bin traha ey. Si tum’e na trabou, e empleado cu a recomenda ta haya un bonus. E bonus ta cuminsa fo’i 350 florin y bay t’e 2000 florin, depende e nivel di posicion. Cu esaki, cada un di nan cu tin un conoci, un amigo, un bisiña cu ta buscando un trabou, ta referi nan pa aplica p’un trabou na Marriott y asina ey nan por haya un incentive bonus.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio