Home Police Ariba dia di tata, e conocido musico Arubano Antoni Gario (52) a...

Ariba dia di tata, e conocido musico Arubano Antoni Gario (52) a pone fin na su bida, den su cel na Warda di Polis

SHARE

Shaba, Aruba:
Diadomingo den careda di 11’or y 45, a bin topa cu preso cu no tabata reaciona mas, e preso a pone fin na su bida den cel na Warda di polis na Shaba, tabata trata di e detenido Antoni Gario, keda a wordo deteni diabierna ultimo. Mesora a bati alarma y cu hopi urgencia a pidi pa presencia di ambulance.

Na yegada di ambulance, e paramediconan a cuminsa na trata di reanima Gario, pero e tabata envano, Antoni Gario ya no tabata duna señal di bida mas. E la fayece, hopi lihe Janine Rodriguez di slachtofferhulp a presenta na Warda di Polis.  Algo prome cu 2’or di merdia auto di shershe a bin busca e curpa di Gario y a hibe na un cas Funeral na San Nicolas.

Wilfred Antoni G.M. Gario a nace na Aruba, dia 7 di juli 1969, e tabata un persona hopi conoci den comunidad di Aruba. Especialmente den e mundo di musica na Aruba. Gario a lanta e banda Le Groove, e ta doño y cantante di e banda aki. Riba 28 di mei ultimo Le Groove a duna un presentacion na Soul Beach Festival 2022 den Harbour Arena.

Diabierna, Aruba y muy especial e fansnan di Le Groove a wordo geshock cu detencion di Gario, door di recherchenan di Jeugd en Zeden Politie. Su detencion tabata relaciona cu un investigacion cu a inicia na 2019, na momento cu su yiu muher a entrega un keho di abuso sexual contra Gario, caminda cu e tempo ey e yiu muhe no tabata tin e edad di 16 aña ainda.

For di e keho cu e yiu muhe mes a entrega contra su tata, mester a haci un investigacion riguroso y extenso.

Despues di haya tur e informacion necesario Ministerio Publico (OM) a haya cu tin suficiente base pa duna JZP e ordo pa detene Gario.

E yiu muher cu a entrega e keho, mes ta bibando na Hulanda y bou tratamento di profesionalnan lo a yega na e punto di por a entrega un keho contra su tata.

E suicidio di Gario tin atencion di autoridad y mesora a cuminsa cu un investigacion, cu lo wordo conduci pa cuerpo di Landsrecherche di Aruba.

Segun nos a compronde cu lo tin camara na unda e celnan na warda di polis ta, pero cu no ta tur of niun ta trahando. Un of dos persona di CEA so pa controla tur e celnan, duna e detenidonan awa y cuminda, habri craanchi pa nan baña, atende cu nan, ta mustra cu no tin suficiente personal pa cuida e detenidonan. Esaki a yega asina leu cu Gario a haya suficiente tempo pa a pone fin na su bida.  Atardi ora e personal di CEA bay of dianan cu no tin personal di CEA disponibel, e situacion ta bira pio, pasobra ta e polisnan na warda mes, mester haci e trabou cu e personal di CEA ta haci normalmente. Riba un dia of un anochi hopi druk, por dura mas cu un ora, cu niun polis ta pasa controla e detenidonan. Un detenido por bira malo e por grita mes niun hende no lo scuche. Ta bira tempo pa pone tur camara di siguridad traha bek y mester bin miho control den e parti di celnan na wardanan di polis.