Segun China su telescope gigante yama Sky Eye lo a detecta señalnan di un civilasacion extraterrestre, esaki segun un informe di Science and Technology Daily cu a wordo confirma door di gobierno.
Pero cu mesora a delete e informacion di e descubrimento.
E señalnan Broadband electromagnetico capta door di Sky Eye cu ta e radio telescope mas grandi di mundo ta diferente di esunnan capta anteriormente.
Segun Zhang Tonjie cu ta na cabes di e team cientifico, nan ta bezig investigando esakinan mas profundo. Esaki ta e mesun un team cu buscando contacto cu civilisacionnan extraterrestre y ta wordo subsidia door di Universidad Normal di Beijing, Observatorio Astronómico Nacional di e Academia di Ciencias di China y tambe Berkeley University na California.
No ta duidelijk kiko tawata e motibo cu a delete e informe valioso aki for di e website di Science and Technology Daily, cu ta e corant oficial di e Ministerio di Ciencia y Tecnologia di China, aunke ya e momento eynan e la bira un noticia tendencioso ariba e Red Social Weibo y a wordo buta door di otro Medionan di Comunicacion incluyendo esnan estatal.
September 2020 Sky Eye cu tin un diameter di 500 meter y cu ta keda den e provincia di Guizhou den e zuid oost di China a cuminsa oficialmente cu e buskeda di bida extraterrestre.
Na 2020 e team a detecta dos señal hunto durante cu nan tawata pasa ariba e datonan compila na 2019.
Na 2022 nan a bolbe detecta señalnan sospechoso durante e datonan di observacion di obhetivonan yama exoplanetanan( planetanan cu ta keda pafo di nos sistema solar).
China su Sky Eye ta uno extremadamente sensitive den e banda di radio di frecuencianan abou y tin un rol fundamental den e buskeda di civilisacionnan extraterrestre, asina Zhang a informa.
Sinembargo, e señalnan sospechoso nan aki lo por ta di un tipo di storing di radio y ta rekeri mas investigacion, asina nan a bisa.
E medio Bloomberg News cu ta uno renombra a yama Science and Technology Daily varios biaha pero no a haya niun contesta.
