Den conferencia di prensa di Gobierno di Aruba diahuebs mainta, Prome Minister Evelyn Wever-Croes a splica mas tocante e Wever-Croes Norm, e Landverordening Normering Topinkomens (LNT), mirando cu esaki ta treciendo cierto preocupacionnan den comunidad.
A traves di e comision Corporate Governance, Gobierno a haci un encuesta riba salario na unda 12 entidad semi-publico a participa pa loke ta e “Top Inkomens”, e salarionan mas halto. A tuma nota cu e salarionan ta varia hopi y ta yega te na mas di 694 mil florin. Gobierno ta di opinion, mirando cu no ta un compania priva pero ta un compania estatal, e diferencia asina grandi den entrada no por wordo hustifica. Pa e motibo aki tambe, Gobierno a dicidi pa introduci un norma.
Condicion di Hulanda pa haya sosten di likides:
Na prome instante Gobierno a propone un norma cu ta yega 410 mil florin. Den e grafico adhunto, por mira cu di e 12 encuestanan, 9 lo a cay bou di dje y 3 no pa cua motibo lo mester a ahusta e 3 nan cu ta surpasa e norma.
Sinembargo Hulanda a pone como condicion pa haya sosten di likides, cu mester baha e suma te na 261 mil florin cu ainda ta basa riba 130% salario di Minister President. Pa e norm stipula di 261 mil florin, un entidad so di esunnan encuesta ta cay bou di e norm aki, 249 mil florin pa aña, manera indica den e tabel. E salario mas halto ta 694 mil florin pa aña. Esaki ta mas o menos 40-50 mil florin pa luna. Esaki ta 4 pa 5 biaha mas halto cu un salario di un minister.
Motivacion:
E motivacion tras di esaki ta cu ora un compania estatal tin menos gasto di personal, dus bahando salario lo tin menos gasto di personal, e placa extra por bay pa Gobierno como dividendo of “winstuitkering” y Gobierno por uza esey pa paga su gastonan of paga Hulanda bek. Esaki te motivacion cu tin tras di e exigencia aki di Rijksministerraad, Prome Minister a accentua.
Norma ya ta wordo aplica:
Prome Minister a indica cu Gobierno ya caba a bin ta aplicando e norma aki desde principio di gobernacion di Gabinete Wever-Croes. Ehempelnan di esaki ta e Director di ELMAR, WEB y Utilities cu ta cay caba bou di e Wever-Croes norm. “Kiermeen ya caba nos ta cumpliendo cu esaki apesar cu e no ta un ley”, Prome Minister a enfatisa.
Gobierno a traha riba e ley cu ta basa riba e hecho cu Gobierno a mira cu tin hopi salario cu ta surpasa e norma. Aworaki el a bolbe bin riba mesa como exigencia pa Gobierno por paga empleadonan publico e 5% bek. E ley aworaki ta na Parlamento.