ORANJESTAD – Cuminsando e fin di siman aki, diasabra, diadomingo y dialuna, lo tuma luga reunionnan riba nivel di Gobierno entre Prome Ministernan di Aruba, Corsou, Sint Maarten y Secretario di Estado Alexandra Van Huffelen.
E reunionnan lo bay cuminsa diasabra cu e topico RAFT entre Aruba y Hulanda. Diadomingo ta cuminsa cu preparacionnan pa delibera riba COHO y lo continua cu e mesun tema aki Dialuna tambe. Durante di e reunionnan aki lo bay delibera di e futuro di RAFT, di COHO y Rijkswettten, teniendo na consideracion locual e Parlamentonan di e paisnan Aruba, Corsou, Sint Maarten y Hulanda a indica caba.
Prome Minister Evelyn Wever – Croes durante conferencia di prensa di Gobierno di Aruba diahuebs mainta a duna di conoce cu na final di e reunionnan, lo tin un conferencia di prensa pa informa comunidad con tur esakinan a bay.
“Ta spera cu e reunionnan y negociacionnan lo bay ta exitoso y cu por saca e miho cu por saca di dje pa Aruba”, Prome Minister a termina bisando.