For di 1 di april 2021, Codigo di Proteccion, cu ta un LBham (LANDSBESLUIT algemene houdende maatregelen) a drenta na vigor. Esaki ta nifica cu nos profesionalnan den e sectornan di husticia, social, enseñansa y salud tin un plan di 5 paso cu nan ta traha cu ne, na momento cu tin (sospecho di) abuso di mucha. Pues ta traha for di un cuadro uniforme y cu e procesonan di trabou mihor delinea, pa brinda ayudo y/of sosten mas liher cu ta posibel, a base di señalamento concreto.
Dia 9 juni 2022 e Supervisor di Codigo, sra. Gisela Polo y e director di SVGA, sra. Els van Hommelen a entrega lider di proyecto di sector social, Efraim Suurendonk, nan plan di maneho di Codigo di Proteccion, na momento cu tin (sospecho di) abuso di mucha.
Ta di aplaudi cu SVGA ta e promer instancia den e sector social cu awor tin un maneho completo y detaya, ora ta trata di (sospecho di) abuso di mucha. Esaki kiermen cu tur empleado profesional, cu ta traha cu mucha na SVGA, ta bay traha conforme nan plan di maneho di Codigo di Proteccion. Mas cu claro Codigo di Proteccion ta elogia tambe con e proceso di implementacion di e Codigo riba su mes a cana den SVGA. A demostra un disposicion completo, pa traha na un manera diferente y bayendo den un direccion preventivo y structural.
Sra. Gisela Polo, como un Supervisor di Codigo di Proteccion, a introduci y a presenta nan plan di maneho na e docentenan y e profesionalnan di e scolnan di “Duna un man” y “Bibito Pin”. Asina SVGA ta percurando cu e maneho riba tereno di abuso di mucha ta drenta ful den e team di SVGA.
No por keda sin menciona, cu esaki sigur tabata un meta di sra. Gisella Polo y e team di SVGA y aplaudi nan p’e logro aki. Danki na nan esfuerso y disposicion a conduci na un plan di maneho integral di Codigo di Proteccion, ora nan como instancia y profesional encontra e casonan di (sospecho di) abuso di mucha.
E team di Codigo di Proteccion y sigur e lider di proyecto ta sumamente contento y orguyoso cu boso plan di maneho, cu ta un herment efectivo y uniforme na bienestar general di nos muchanan.
Un biaha mas pabien cu e logro aki di parti di e team di Codigo di Proteccion!