ORANJESTAD – Mundo ta celebra e luna di Juni manera Luna di Orguyo pa e comunidad LGBT+ cual ta un celebracion anual cu ta reconoce derechonan igual pa esnan cu ta forma parti di un minoria sexual. Accion21 a haci un sondeo riba con nos comunidad ta para den cuadro cu introduccion di matrimonio entre personanan di mesun sexo, na unda cu 57% ta aproba esaki riba nos Pais.
Un gran cantidad di gobiernonan rond mundo ta considerando of ta den e proceso di reconocemento legal di matrimonio pa pareha di mesun sexo. The Human Rights Campaign Foundation ta encarga pa sigui desaroyonan den loke ta reconocemento di matrimonio di mesun sexo rond mundo. Actualmente nan ta raporta cu tin 31 pais na unda cu matrimonio pa pareha di mesun sexo ta legal y e lista aki lo sigui crece den forma cu e procesonan ta andando mundialmente.
Den cuadro cu esaki, un sondeo a wordo haci na Aruba entre 25 di Maart pa 3 di April 2022, cu un total di 1,200 entrevista efectivo considerando quotas geografico y demograficonan manera sexo, edad y nivel di educacion. E sondeo aki ta refleha cu 57% di e poblacion di Aruba ta aproba matrimonio pa pareha di mesun sexo, y 43% ta desaproba. E margennan di eror maximo di e encuesta ta +/-2,6 punto di 95% di e confiansa di e estadisticanan. Adultonan, hende homber y hende muhe residente di Aruba cu nacionalidad Hulandes y cu derecho di voto den tur region y districto di Pais Aruba ta esnan cu a participa. E sondeo a wordo haci via entrevistanan online cu control stricto di quotas y control di seleccion di esnan entrevista na cada momento. Un cuestionario structura a wordo uza cu solamente esnan residente cu facultadnan di eherce voto na Aruba a uza.
E regionnan of districtonan cu ta mas na fabor di esaki ta Noord, Tanki Leendert y Oranjestad-West, como tambe Savaneta. E partinan di Oranjestad-Oost y San Nicolas-Noord ta e regionnan cu menos ta aproba esaki. Remarcabel tambe ta pa mira cu 54% di hende homber y 60% di hende muhe ta na fabor pa matrimonio entre persona di mesun sexo. Por nota cu 68% cu ta entre edadnan 18-29 ta aproba esaki, y 32% ta desaproba. Tambe 45% di hende homber y hende muhe entre edadnan di 60+ ta aproba, y 55% ta desaproba. Por mira den e parti di nivel di educacion con 72% di esnan cu HBO/Bachelors ta na fabor y 28% ta desaproba. Un 61% di esnan cu enseñansa universitario/masters/y doctorado ta aproba, y 39% ta desaproba.
Organisacionnan mundial ta den punto di bista tog cu ainda falta hopi trabao pa haci pa e generacionnan nobo wordo educa y desaroya den un pais caminda matrimonio pa pareha di mesun sexo ta wordo respeta igual. Obviamente ta di compronde cu tin persona cu lo ta contra esaki y nos ta biba den un democracia aki na Aruba, pues tur e hendenan aki tin e derecho di defende nan posicion.
“Locual si nos kier, ta den e parti di igualdad unda nos tin e mesun derecho. E gran mayoria di e poblacion Arubiano ta na fabor di e cambio aki. Ami personalmente ta mir’e cu na un banda bo tin exclusion, discriminacion y rechaso, y na otro banda tin resilencia, amor y inclusion. Pa mi ta hopi cla na ki banda nos creador ta. Pa e motibo aki, ta importante ora nos wak den nos historia e avansenan cu a bini den e tema aki cu semper a wordo logra pa hendenan dentro di e comunidad aki,” sr. Mansur ta splica.