Home Politics Mike Eman mester cuminsa papia cla pa loke ta e 1500 ambtenaarnan...

Mike Eman mester cuminsa papia cla pa loke ta e 1500 ambtenaarnan di mas den gobierno

SHARE

 

 

 

Partido MEP a tuma nota di e ultimo carta di CAFT caminda e comision di supervision ta rechasa e reaccion di gobierno pa loke ta e presupuesto 2022 di pais Aruba. CAFT ta di opinion cu den e reaccion ultimo cu gobierno a manda pa nan, gobierno  a cumpli cu solamente 1 recomendacion y cu no a duna suficiente atencion na e otro 12 recomendacionnan.

 

Un di e recomendacionnan cu constantemente ta bin padilanti di parti di CAFT ta e limitacion di e gastonan di personal na 2022 te na un maximo di 417 miyon florin. Esaki ta un topico cu semper ta bin den discusion y cu a haya su origen for di tempo cu lider di AVP Mike Eman na oktober 2006 a declara cu e aparato gubernamental tin 1500 ambtenaar di mas y ademas un areglo di pensioen inpagabel.

 

Pero kico nos por a mira ora cu AVP a asumi poder na 2009? Gabinete Mike Eman na 2009 a haya e gastonan di salario y contribucion di gobierno na 425.4 miyon florin y na final di nan gobernacion na 2017, nan a aumenta esaki te na 476.1 miyon florin, pues un crecemento di gastonan di salario y contribucion di gobierno cu 12% den apenas 8 aña.

 

Awor e pregunta ta pakico na 2006 Mike Eman a fomenta e mentira cu gobierno tin 1500 ambtenaar di mas, siendo cu ta su gobierno mes a aumenta e gasto di salario cu 12%? Esaki no ta un contradictio in terminis? Pakico awo na 2022 su persona – ayuda pa CAFT – ta insisti pa manda ambtenaarnan cas y asina kita pan for di boca di e yiunan inocente?

 

Pa loke ta e areglo di pensioen di ambtenaarnan, Gabinete Mike Eman si a cumpli cabalmente cu nan promesa, esta nan a hisa e edad di pensioen te 65 aña, a introduci Middelloonregeling, a aumenta Franchise di Af. 14059 fl. te Af. 17616, a reduci e Duurtetoeslag di 36.1% te 17.7%, e porcentahe di acumulacion di pensioen a baha di 2.15% te 1.75% y a elimina Bashi Premie y Gelijk Bedrag di e pensionadonan despues di 2015.

 

Cu awe Mike Eman ta hunga politica barata y ta insisti pa e gobierno actual sigui baha e gastonan di salario y contribucion di gobierno, lo ta bon pa e mustra na unda y con mester manda e 1500 ambtenaarnan cas manera cu el a priminti na 2006.