SAN NICOLAS – Diasabra ultimo Kiwanis Club of San Nicolas a organisa e prome edición di “Raising Princess into Queens – Being Me & Loving It!!!”. E evento tabata un evento organisa pa empodera mucha muher nan di nos isla, door di diferente topico nan di interés pa formación di nos hoben nan.
E evento a tuma lugar na Filomena College Mavo y a conta cu 52 participante, di tur parti di nos isla. Sra. Endrah Richardson–Gumbs presidente di Kiwanis San Nicolas, a habri e mainta yamando tur participante bon bini y a enfatisa na nos hoben cu obstáculo nan por wordo venci cu un actitud positivo. A demostra esaki door di bisa e muchannan: “si mi no a bisa boso, boso no tabata sa cu mi a sali for di cas cu dos diferente sapato bisti”. Un momento chistoso, pero impactante presenta door di Presidente Endrah.
E participante nan a wordo sopresa cu un bishita special door di nos Prome Minister, sra Evelyn Wever – Croes. Min.Pres. a duna un discurso eloquente y a comparti algún experencia personal cu e participantenan.
Otro parti special ta ora cu directora y sub-directora di Filomena College Mavo, juf. Raquel Lampe y juf. Joraine Oduber a yama tur nos hoben nan bon bini na Filomena. Juf. Lampe tambe a conta un storia personal con el a vence obstáculo nan pa awe ta para eynan como directora di dicho scol. “Mi no a haci e mihor escogencia nan ora mi tabata mas jong, pero mi a para pa nan y na edad di 30 aña mi a bay scol bek. E tabata un periodo nervioso y mi a logr’e”, ta locual juf. Lampe a comparti. Cu e conseho aki na e hoben nan, juf Lampe kier a enfatisa cu si nan kier logra algo, nan concentra cu siguransa na e meta y nan lo logra esaki.
Siguientemente, participante nan a atende diferente sesión. E prome tabata “Salud Mental”; e parti di “Being Me & Loving It!!!. guia door di Sra. Charisse Hoen, Dahariana Evertsz y Empowerment Queen, Nicole Godett.
Tambe participante nan a haya oportunidad pa atende 3 diferente sesion. ‘Feminine Hygiene’ patrocina dor di Compra Aruba cu nan producto Always. Sra Jadira Leter hunto cu asociadonan di Famia Planea a comparti e importancia di un higiena limpi, especialmente durante nan periodo. Sra. Erika representante di Always a duna tambe splicacion encuanto di tur e producto nan cu Always ta ofrece. Always activamente ta educando nos hoben nan cu nan programa #EndPeriodPoverty. Kiwanis San Nicolas ta hopi agradeci na Sra. Ana Maria Ramirez y Always Aruba pa brinda nos participante e oportunidad aki dor di yuda y papia di menstruacion.
Nos Miss Aruba, Thessaly Zimmerman a duna nos participante un session di etiquette. Den un manera interactivo y educativo participante nan a siña encuanto di etiquette y nan comportacion corporal.
E di tres sesión presenta pa miembro di Kiwanis San Nicolas Sra. Esther Emerencia–Gomes hunto cu su ruman Sarah Gomes conocí como “The Gomes Sisters”. Nan a presenta “Con bo ta presenta bo mes”, tanto profesionalmente pero tambe cu e toke di fashion. Nos mucha muhe nan a encanta e sesión aki.
Pa conclui e mainta exitoso aki, O’Niels Caribbean Kitchen y Neigha, a percura pa un suculento almuerzo. Danki pa e contribución aki di O’Niels y Neighba. Participantenan por a sinta na mesa pa saboria e almuerzo y comparti nan experiencia di e mainta cu e presentadoranan y demás miembronan femenino di Kiwanis San Nicolas. Tambe un gradicimento na Mercal Trading N.V. pa nan contribución na e bunita evento aki.
Y pa despedí den un forma amical, Sra. Giandra de Cuba di Level Up Leadership & Personal Development a comparti tambe su experiencia personal como empresario, cu e hobennan. Cu hopi interés y empodera, nos hobennan a despedí di e mainta educativo y exitoso aki.
