ORANJESTAD – Gobierno di Aruba tambe ta contribui na e campaña 3C-TRECE di Archivo Nacional Aruba ANA pa Colecta, Conoce y Conserva nos herencia cultural. Riba Dia di Archivo y den cuadro di e campaña 3C-TRECE di ANA, Minister President Evelyn Wever-Croes a entrega Minister di Cultura Xiomara Maduro tur e conferencia nan di prensa y programa special di Gobierno desde e temporada di pandemia te cu dia 6 di juni 2022. Di e manera aki ANA por archiva y conserva e informacion importante aki pa tur hende por conoce y sa mas di kiko tur Aruba su gobernacion a pasa aden durante e pandemia di covid 19.
Nos tur por corda ainda con durante e pandemia Minister President tabata presenta tur anochi pa 7or, un conferencia di prensa pa brinda informacion di e desicion nan cu e Crisisteam tabata tuma pa Aruba por a enfrenta y surpasa e efectonan cu e pandemia di covid 19 a trece cun’e pa Aruba. Banda di esaki tabata tin hopi programa special den cual mas minister y instancia a brinda informacion pa tene e pueblo bon informa den e momentonan di hopi insiguridad cu Aruba y mundo tabata pasando aden. Asina por ehempel, Minister Maduro e tempo ey como mandatario encarga cu Finansa, Economia y Cultura a traha varios programa pa informa riba e yudansa financiero brinda pa Gobierno den forma di Subsidio di Salario, Sosten Financiero na negoshi chikito y mediano, y tambe UNOCA Cares pa e mundo cultural. Ta informacion importante cu ta mustra con Gobierno di Aruba a traha den un pandemia pa tene Aruba stabil den momentonan di hopi insiguridad.
Minister Maduro ta gradici Minister President y full e ekipo di PR di Gobierno di Aruba pa a percura pa archiva tur e informacion importante aki di nos Pais. Esaki sigur ta un aporte valioso na e memoria colectivo di Aruba, cu awor ta keda disponibel pa tur hende na ANA. Minister Maduro ta extende un invitacion pa Pueblo en general participa na e campaña 3C-TRECE y pasa entrega material historico na ANA diasabra awor 11 di juni di 10or pa 2or di atardi. Danki di antemano pa e contribucion importante aki na e conocemento y bienestar di Aruba.