Mike Eman, lider di Fraccion di AVP, un lider cu NUNCA ta asisti na reunionnan caminda ta e lider di Fraccion mester ta presente. Desde cu mi ta lider di Fraccion di MEP ta un biaha so mi a tope den un reunion caminda ta e lidernan di fraccion ta sinta hunto, anto esaki ta pasobra nos tabata den tratamento di presupuesto 2022. Ultimo temponan aki sporadicamente e sa tey den algun reunion di comision fiho pero mas tanto su presencia ta pa desacredita y ripiti su vision cu a hinca nos pais den un desaster financiero. Ta mas cu obvio cu e ta sali solamente pa haci show politico, crea chaos, instiga y dividi pueblo.
Tin ora mi ta puntra mi mes dicon tur su preocupacionnan actual e no por tabatin nan ora e tabata endueda nos pais innecesariamente. Invertiendo solamente den infrastructura y embeyecimento, lagando nos hendenan un banda. No ta coy loco, Mike Eman a endueda nos pais cu dos mil dos cien (2200) miyon florin anto den tempo cu cos tabata bon. Si el a maneha e pais aki responsablemente, awe nos pais lo tabata mihor para, sin tanto debe y proyectonan PPP. Si el a haci loke awe e ta predica, nos no mester a fia mil dos cien (1200) miyon for di Hulanda pa wanta cabes di nos pais riba awa, door di duna FASE, subsidio di salario y sosten financiero na companianan chikito y mediano. E ta come lubida, pasobra ta door di su mal maneho awe nos ta asina depediente di Hulanda, y mara na condicionnan indesea. Si el a haci su trabou na drechi awe nos lo por tabatin buffers pa por a brinda nos pueblo e alivio cu awe cu boca grandi e ta grita pe. Nos por a carga parti di e aumento di prijs di gasoline, cu por cierto ni cuanto e insinua, Gobierno di Aruba absolutamente no por hunga un rol riba su desaroyo. Tur parti di mundo e prijsnan ta subiendo drasticamente.
Mike Eman enberdad a bira e mensahero di mal noticia y no tin nunca algo postivo pa presenta y mucho menos ta aporta na solucionnan berdadero. Ta critica tur cos pero nunca ta indica con e lo a haci’e diferente y mas importante no ta indica di unda e lo saca e placa. Cu Aruba, mescos cu full mundo, ta pasando den momentonan dificil ta un berdad. Un berdad cu nos a bin ta biba desde cu COVID 19 a bati na nos porta. Un berdad cu un y tur ta bibando diariamente. Na lugar di stop di dividi y bin cu sugerencianan concreto, e ta haci comosifuera COVID no a impacta nos isla financieramente, economicamente y socialmente. Hopi tristo pa wak un lider di Fraccion sigui cu su mesun campaña di hunga cu sentimento di hende, haciendo manera e si lo por a preveni cu gasoline y costo di bida ta subi. E realidad ta cu e ta fenomeno mundial, y cu sigur ta pone retonan grandi riba nos gobierno cu ya a bin ta traha desde 2017 cu un caha masha limita, pero no obstante esey a sa di maneha e pandemia debidamente y poco poco ta trahando riba e recuperacion di nos isla.