Home Local “Den un solo palabra ela describi’e como increibel” Brigida Croes ta...

“Den un solo palabra ela describi’e como increibel” Brigida Croes ta cumpli 50 aña di servicio, alegria y lealtad na HOH

SHARE

 

 

 

“Mi tin un aprecio enorme pa un persona manera abo cu pa 50 aña largo a hinca tur su esfuerso, curason y amor pa Hospital, nos coleganan pero mas importante e pashentnan,” asina Jacco Vroegop- director di HOH a habri su discurso. Un celebracion a tuma luga recientemente na unda den gran forma a invita tur colega na HOH pa pasa come bolo y asina recorda 50 aña di trabou di Brigida Croes cual tur persona na HOH sigur conoce. Durante e celebracion aki, banda di Hunta di Directiva di HOH, management y coleganan tambe a yama bon bini na Minister di Salubridad, sr. Dangui Oduber cu a hiba algun palabra di gradicimento pa Brigida su empeño pa cuido en general na Aruba. 

 

Brigida Croes a cuminsa su carera den cuido na Hospital San Pedro di Verona na aña 1972 como Verpleegassistent algemeen. Na aña 2002 ela bay p’e reto di recepcionista  y na aña 2004 ela cuminsa den cuido pastoral te cu dia di awe cu e ta bisa ayo na HOH. Durante su discurso manera semper e la conta diferente anecdota di su carera na HOH y loke a sobresali ta cu den un palabra Brigida a describi su 50 aña na Hospital como “increibel”. 

 

“50 aña di trabou na Hospital ta algo cu no sa sosode y pues ta motibo di e celebracion bunita aki unda alabes ta dispidi di Brigida awo cu e ta baha cu pensioen. Normalmente celebracion di hubileo y pensioen ta tuma luga riba e departamento concerni, pero 50 aña di dedicacion, amor y pasion pa Hospital y su pashentnan no por a laga pasa sin mas. Mi ta hopi orguyoso di Brigida, despues di a traha algun aña cune y por mira con stima e ta pa pashent y colega y sigur tur hende lo bay haya su falta,” sr. Vroegop a termina bisando. 

 

Brigida ta un persona conoci pa comparti y ta hende di tur hende. Asina aki e ta comparti desayuno cu coleganan of ta trece bolo y parti’e pa asina tur hende haya un pida. Tambe e ta haak muts y handschoen pa baby riba piso pa asina nan no haya frieu. Y semper ta decora e skina banda di su oficina pa dia di Himno y Bandera, Pasco, Valentine’s day y mucho mas. Un persona hopi stima pa coleganan y pashent, tambe tur Pastor y e comunidad di guia religioso.  

 

Brigida a dedica casi ful su bida na HOH y su pashentnan. 50 aña di alegria, lealtad, amor, comprension y pasion a resalta y Hospital completo y pashentnan lo bay haya su falta. Brigida danki di curason y awo bay gosa di bo pensioen bon mereci! 

 


FIN