Den e verslag pa loke ta trata e dos leynan di consenso di Reino COHO y RAft cu a keda manda Hulanda dia 20 di mei 2022, mi a haci varios pregunta y a duna comentario, critica y sugerencia pa cambio. COHO ta para pa Caribisch orgaan voor hervorming en ontwikkeling y RAft pa Rijkswet Aruba financieel toezicht. Durante e simannan venidero mi lo bai sigui saca varios articulo ampliando riba e dos concepto di leynan aki. Den e articulo aki mi lo bai amplia riba e articulonan den ambos ley cu ta specifica e nombramento y posicion legal di e organonan di supervision y kico mi ta pensa di e contenido di esakinan.
Articulo 3 di RAft
Articulo 3 ta trata e nombramento y posicion legal di e organo di supervision. E puntonan mas importante pa menciona ta cu e organo di supervision lo consisti di tres miembro, di cual un presidente, y nan lo wordo nombra a base di experticio. E procedura di nombramento di e miembronan ta den man di e conseho di minister di Reino y ta tuma lugar como lo siguiente ti di: e miembro cu lo ta e presidente lo wordo nombra door di Minister President di Hulanda den su funcion como presidente di Conseho di minister di Reino, un miembro lo wordo nombra den acuerdo cu sentimento (“met het gevoelen”) cu Conseho di minister di Aruba riba recomendacion di Prome Minister di Aruba y un miembro lo wordo nombra den acuerdo cu sentimento (“met het gevoelen”) cu Conseho di minister di Hulanda riba recomendacion di Prome Minister di Hulanda. Por ultimo e miembronan ta wordo nombra pa tres aña y despues di e termino aki nan por wordo renombra.
Den e verslag mi a enfatisa riba e hecho cu tur tres miembro ta wordo nombra door di conseho di minister di Reino y ningun door di Aruba, specialmente pasobra cu RAft ta conta specificamente pa Aruba. Mas cu claro mi a haci e pregunta e ora dicon Aruba no por nombra directamente un miembro den e organo di supervision.
Un otro punto cu a sobresali den e articulo aki ta cu no ta menciona cuanto biaha e miembronan di organonan di supervision por wordo renombra. Manera cu e ta skirbi den e ley e miembronan por keda wordo renombra cada tres aña. Pa e motibo aki mes mi persona a haci e pregunta dicon no a stipula esaki manera den e ley di consenso di Reino COHO unda cu akiden si ta stipula cu e miembronan di e organonan di supervision di COHO por wordo renombra solamente un bes. Pa e motibo aki a pidi na Hulanda pa haci cambio den e articulo aki pa asina e coincidi cu esun di COHO y asina e miembronan di e organonan di supervision por wordo renombra despues di tres aña solamente un biaha.
Articulo 9 di ley di consenso di Reino COHO
Articulo 9 ta trata e nombramento y posicion legal di COHO (organo di supervision). E puntonan mas importante pa menciona ta cu e COHO lo consisti di tres miembro, y di cual e presidente y minimo un otro miembro tin ‘aantoonbare affiniteit’ (afididad demostrabel) cu e islanan Aruba, Korsou y Sint Maarten. Tur tres miembro ta keda nombra door di Hulanda a base di un conclusion di Conseho di Minister di Reino cu na su turno ta keda tuma for di un procedura pre describi. Esaki ta consisti di un lista di posibel candidato traha pa Hulanda y presenta na un benoemingsadviescommissie cu ta consisti di tres miembro cu nos islanan por duna nan sentimento over nombracion di un representante. A base di un “profielschets” lo saca un conseho pa Conseho di Minister di Reino.
Den nos verslag nos ta sugeri pa tur isla por nombra un representante cual ta haci cu e organo di supervision lo consisti e ora di cinco miembro na lugar di tres. Na mes momento nos a cuestiona e palabra ‘aantoonbare affiniteit’ mirando cu ningun caminda ta keda indica kico esaki ta encera y con ta bay midi esaki. Segun nos opinion e splicacion al respecto ta vaag y insuficiente. Mirando cu ta keda menciona un profielschets y esaki no ta como anexo agrega, nos a manda pidi esaki. Un punto cardinal y cu no a tene cuenta cu ne y cu nos ta haya hopi importante ta cu e miembronan mester tin conocemento encuanto “small island development states” pasobra den tur aspecto nos situacion ta sumamente diferente cu e situacion di Hulanda cu ta un pais grandi. Na mes momento nos a haci e pregunta con nan ta bay garantisa cu e miembronan tin conocemento di economianan chikito manera esun di Aruba.
Ta keda awor pa warda e contestacion di parti di Hulanda pa wak na ki manera nan ta contesta nos preguntanan y alabes atende cu nos comentario, critica y sugerencia pa cambio.