ORANJESTAD – Gobierno di Aruba ta recomenda tur esnan riba 60 aña pa bay busca e di dos booster, y esnan riba 18 aña ta wordo recomenda pa bay busca e prome booster. Haciendo esaki lo percura pa sigui proteha contra e virus.
Durante di Conferencia di Prensa di Gobierno di Aruba, Prome Minister Wever – Croes a presenta e cifranan di vacunacion. “Ta importante pa menciona cu te na e momentonan aki vacunacion ta e medio mas efectivo cu tin pa combati e efectonan di covid,” Prome Minister a bisa.
Pa loke ta e prome y di dos vacuna, casi 80% di esnan mayor di edad na Aruba ta vacuna. Sinembargo pa loke ta e di tres shot (e prome booster shot), solamente 54% di esnan riba 60 aña a busca e booster shot, ciendo cu e prome, tin 90% di esnan riba edad di 60 cu a tume. E grupo riba 60 aña tambe ta bin na remarca pa haya e di dos booster shot, pero lamentablemente e ta solamente 8% di esnan riba 60 aña a busca e booster shot. Pa esnan riba 18 aña, e porcentahe cu a busca e prome booster shot ta apenas 36%, pues akinan ta caminda cu ta mira cu tin espacio pa mehora y proteha nos mes.
Esnan cu ta puntra con ta haci pa vacuna, Prome Minister Wever – Croes a splica cu na e momentonan aki debi na e interes abou cu tin na Aruba pa vacunacion, e unidad mobiel no ta disponibel riba caya. Pero, por pasa libremente na DVG durante e oranan di trabou entre 8or pa 12or y tambe entre 1or pa 4or pa tuma e vacuna. No mester haci cita, pero pa cualkier informacion por yama 2800101.
Premier Wever – Croes a expresa cu ta importante pa comunidad ta consciente cu e riesgo pa wordo contagia cu Covid ta aumenta awor cu e cantidad di casonan ta aumentando. Pesey ta necesario pa pueblo vacuna. “Hunto nos ta aumenta e grado di proteccion cu nos mester pa evita cu ta haya y/of sigui plama Covid.”