Prome Minister Evelyn Wever-Croes, dialuna mainta den Conferencia di Prensa di Gobierno di Aruba, a elabora ampliamente riba e ley Wever-Croes-Norm. Huridicamente e ley aki yama Landverordening Normering Topinkomens (LNT). E ley, e Wever-Croes-Norm, ta bin cu un maximo pa directornan den sector semi publico. Un sector semi publico ta e companianan estatal di Gobierno. No ta trata aki di Departamentonan di Gobierno cu ya tin un maximo caba pa loke ta trata salario di directornan cu ta esun di mas abou di Aruba, Corsou y Sint Maarten.
Prome Minister a indica cu e Wever-Croes-Norm a bira mas actual ultimente pa motibo cu Gobierno di Hulanda a pone esaki como un condicion pa Gobierno paga e 5% bek na ambtenaarnan entrante juli proximo.
MAXIMO PA SALARIO:
Gobierno di Aruba a constata cu tin directornan di cierto companianan estatal ta cobra un salario hopi halto. Prome Minister a enfatisa cu scuchando e reaccion di pueblo cu mientras prijs di awa y coriente ta subi, no ta husto cu salarionan di directornan ta asina halto. Pa e motibo aki tambe, a bin cu e ley aki cu ya Sint Maarten y Hulanda tin caba pa stimula un maximo pa e ‘top functionarissen’, cu ta e directornan of ‘higher management’ di un compania.
MAXIMO PA ONTSLAGVERGOEDING:
Tambe, e LNT ta bin cu un maximo pa e ontslagvergoeding. Esaki ta ora un compania ta retira un director y mester pag’e un suma. Den e caso aki, un maximo di 12 luna y di 78 mil florin. Prome Minister a duna di conoce cu na principio di su gobernacion, den su ministerio el a bin encontra cu directornan cu tin ‘ontslagvergoeding cu ta yega te cu na 2 pa 3 miyon florin, locual Prome Minister ta considera abuso, por lo tanto a bin cu e ley aki pa e abuso aki pasa pa pasado tambe.
Prome Minister a indica cu pa loke ta trata e maximo di salario pa directornan, e punto di salida di Gobierno ta cu e directornan aki por gana te na un 30% mas cu e salario di un minister, esta tambe e salario di Minister President cu ta igual. Dus 130% di un salario di un minister. E calculacion aki a yega na mas o menos 261 mil florin.
Den e conferencia di prensa, Prome Minister a presenta un tabel indicando e sumanan di salario di 12 instituto semi publico. Por nota e salario mas abou ta 249 mil florin pa aña y esun mas halto ta 694 mil florin pa aña pa e directornan. Esaki ta mas o menos 40 pa 50 mil florin pa luna cu ta 5 biaha mas halto cu un salario di un minister.
“Aki ta unda pueblo a indica cu mester bin un orden den e desorden aki. Pues e ley cu yama Wever-Croes-Norm, Landverordening Normering Topinkomens (LNT), ta awor stipula na 261 mil florin pa aña. Mi mester bisa cu esaki ta algo cu Gabinete Wever-Croes mes ta para p’e. No por tin tanto diferencia entre salario di un director y salario di un minister. 694 mil florin pa aña ta hopi placa. 40 pa 50 mil florin pa luna ta hopi placa. Esaki ta importante pasobra e ley aki a wordo poni como un condicion di Hulanda na e momento cu nos tabata pidi sosten di likides”, Prome Minister a duna di conoce.
Prome Minister a indica cu e ley aki ta na Parlamento y Gobierno ta pendiente pa tende ki cu e lo wordo trata pronto.