Home » Miguel Mansur: Xiomara vs CAFT

Miguel Mansur: Xiomara vs CAFT

by Admin
0 comment 117 views

 

 

Cu hopi interes mi a lesa e ultimo carta di CAFT fecha 10/5/2022 y cu hopi tristesa mi a scucha parti di MinFIC su conferencia di prensa di 02/06/2022. Loke ta keda claro ta cu Gobierno no ta aprecia e realidad di nos situacion financiero y consecuentemente no tin e solucion. Aruba ta e pais mas endeuda di henter Noord, Centro, Zuid Amerika y Caribe midiendo debe/GDP. Nos problema primordial ta tamaño y gastonan di nos sector publico. Corsou cu un poblacion di 160,000 tin mas o menos 2,500 ambtenaar y nos cu un poblacion di 100,000 tin mas cu 4,000 sin conta esnan emplea door di un di e 40 stichting nan subsidia pa gobierno. 

 

Awor pa ta husto, no ta Gabinete Wever-Croes ariba su mes a crea e situacion di desekilibrio aki. Desde 2001 bin dilanti Aruba su crecemento di debe a surpasa su crecimento economico y cu cada aña nos finansas publico a sigui deteriora. Un aparato publico monstroso den tamaño no a resulta a base di necesidad pero danki na e politica di patronahe. Yuda nos cu un voto y nos ta yudabo cu un trabao, te dia e pais kibra y no por carga mas. Wel e momento di kiebra ta na porta, CAFT ta indica cu pa fin di 2023 nos debe lo aserca casi 6 biyon florin. Esey ta sin conta e gastonan di proyectonan PPP cu ta añadi un otro 1,5 biyon mas o menos na obligacionnan financiero di Land Aruba. 

 

E unico solucion pa nos situacion actual ta reduci gastonan di sector publico. E parti mas grandi di gastonan gubernamental ta personal sigui pa servicio di nos obligacionnan financiero. Awor e gastonan social di kita hende masalmente NO ta aceptabel.  E gastonan economico di esey tampoco ta deseabel paso bo lo hinca nos economia den recesion. Si, mester crea incentivo pa cuminsa pasa empleadonan publico pa sector priva y mester trece mas igualdad entre trahadonan publico y esnan di sector priva. E productividad di empleadonan publico ta fatal compara cu esnan di sector priva y gobierno mes ta opera di un manera increibelmente ineficiente. USO INEFICIENTE DI RECURSONAN (LIMITA) TA TRECE POBRESA.

 

CAFT ta señala cu Gabinete Wever Croes II su presupuesto multi-anual ta sigui core un deficit pa e periodo 2023-2026. Esey kier men cu nan plan ta pa laga e proximo gobierno resolve nos problemanan financiero. Si esey ta a base di strategia politico, falta di boluntad of falta di capacidad no ta porta, e ta keda mesun criminal. Mas nos tarda pa implementa reforma cu ta reduci di un forma structural gastonan di sector publico, mas hundo den debe nos ta cay y mas dificil, doloroso y largo nos salida lo ta.  

 

Mi a tende MinFIC bisa cu e carta di CAFT ta un reconteo di consehonan anterior, claro paso boso ta nenga di tuma accion y cuminsa resolve e problemanan door di reduci gastonan di un forma structural. Entre 2022-2026 Aruba lo mester paga bek 4 biyon florin, un gran parti lo por wordo rolled over. E peliger ta cu e deterioracion continuo di nos posicion financiero hunto cu inflacion mundial kier men cu probablemente nos lo mester bay paga un interes mas halto haciendo nos situacion financiero peor ainda. 

 

Mi a keda sorprendi ora Xiomara a bisa cu e no kier pa e cartanan di CAFT wordo publica. E transparencia cu CAFT ta brinda henter comunidad ariba e berdad di loke ta sosodiendo den nos finansas publico mester ta doloroso pe y mi ta compronde pakiko. Ta hopi dificil pa gobierno pretende cu a baha gasto si tur hende por lesa y comproba cu gastonan di producto y servicio ta 39 miyon florin mas halto cu e averahe di 2015 pa 2019. No ban ni considera cu ta 31 miyon florin gobierno mester pa debolbe full e 12,6% recorte salarial. CAFT ta te hasta indica cu gastonan di contrata tercer partido (lesa friends & family) ta mustra un subida drastico. Huur di edificionan (lesa friends & family) tambe a subi excesivamente y ta 40% mas halto cu na 2016 prome cu gobierno a sinta. Tambe CAFT ta indica cu e necesidad pa e gastonan mas halto aki NO ta adecuadamente splica y nos tur por adivina dicon. 

 

Mas tristo ta ora Xiomara a indica cu gastonan di personal a baha, si nan a baha a base di un recorte salarial cu ta crea un cifra artificialmente abao. Si e recorte salarial no tabata existi gastonan di personal lo ta ariba 12% di GDP y pafor di e norma, pa no papia mes di e necesidad di mustra un bahada structural cada aña. MinFIC a menciona e famoso BVP, un plan cu Prome Minister mes a declara den Parlamento di NO a traha. Awor kier haci un estudio di gastonan di producto y servicio di paisnan den region paso nan no ta di acuerdo cu CAFT. Dus awor kier bay compara nos mes cu algun di e paisnan mas corupto y mal administra na mundo pa busca mas espacio pa derroche. 

 

Claro cu CAFT su cartanan ta un inconveniencia pa gobierno y Parlamentarionan di coalicion cu a aproba e presupuesto. Tanto cu nan a grita pa nan budgetrecht y autonomia, nan tur a desconta recomendacionnan di CAFT, Raad van Advies, Algemene Rekenkamer, IMF etc. no pa interes di pueblo, pero pa interes di esnan gobernando y e status quo. Semper mi ta ripiti cu gobierno ta 100% financia pa pueblo, mas gobierno gasta, mas pueblo tin cu paga. Nos kier crecemento economico y hisa inversion, e unico manera pa logra esey ta baha gastonan di gobierno structuralmente pa laga mas placa den saco di pueblo. Sigui hisa gastonan di gobierno mientras ta hisa entradanan door di mas medida ta sigui manca nos economia cu ya caba tin algun di e nivelnan di belasting mas halto na mundo. Un gobierno cu ta desprecia finansas publico sostenibel ta un gobierno cu ta desprecia nos autonomia. Un pais cu no ta para financieramente fuerte, no ta para fuerte den nada. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio