ORANJESTAD – Diahuebs mainta, Cuerpo Policial di Aruba a organisa un “themadag” pa tur e departamentonan di Cuerpo Policial di Aruba pero tambe pa partnersnan externo. Durante e “themadag” di Cuerpo Policial di Aruba, Minister di Husticia y Asuntonan Social Sr. Rocco Tjon a dirigi palabra na esnan presente. Un iniciativa sumamente positivo, caminda tres aspecto ta wordo atendi cune, entre otro e parti di amplia conocemento, e parti di importancia di informacion y e parti di cooperacion, cual ta aspectonan necesario pa por combati criminalidad na un manera mas eficiente y eficaz.
Segun e mandatario, e tres asepectonan aki ta percura pa haci e organisacion aki uno mucho mas fuerte, mirando cu internamente tambe e ta importante pa tin un bon cooperacion pero tambe e informacion necesario pa e cuerpo y e organisacion no bira uno demotiva. Banda di esaki, e conocemento tambe ta uno hopi importante, pa por atende hunto cu tur e diferente specialismonan cu tin e diferente fenomenonan di criminalidad.
Minister Tjon a laga un mensahe hopi importante atras pa tur esnan cu a participa na e themadag cual tawata alrededor di 100 colega, caminda a toca e parti di cooperacion cu e Ministerio di Husticia, pa motibo cu na final di dia e recursonan tambe ta necesario. A splicanan cu e recursonan ta aloca pero e ta necesario pa haya Cuerpo Policial manda e peticionnan aden, y pa e peticionnan aki ta completo, pa di e forma ey na un manera eficiente y eficaz por percura pa nan por haya nan materialnan necesario. Di e forma aki ta evita cu Cuerpo Policial no ta haci uso di tur e fondonan cu tin aloca pa nan, manera tawata e caso aña pasa.
Por ultimo, e mandatario a felicita Sr. Koolman y Sr. Martina kende ta e dos motornan tras di e programa di e themadag y a desea tur e coleganan un dia exitoso.
