Home Politics MINISTER ENDY CROES TA FELICITA SRA. LETITIA WEVER PA UN BUNITA BUKI...

MINISTER ENDY CROES TA FELICITA SRA. LETITIA WEVER PA UN BUNITA BUKI DI POESIA ‘EMOCION DEN PALABRA’.

SHARE

 

 

 

 

 

 

ORANJESTAD: Diamars atardi den ambiente ameno hunto cu invitadonan special na Biblioteca Arubiana a tuma luga presentacion di e buki di poesia ‘Emocion den Palabra’ di sra. Letitia Wever. Un coleccion di poesia hopi bunita y interesante pa lesa. Minister Endy Croes hunto cu colega Minister Evelyn Wever – Croes tabata presente ne ocasion special aki. Minister Endy Croes a expresa cu pe ta un gran honor pa por a presencia lansamento di e buki cu ta compila un cantidad di poesia. ‘Nos por a scucha algun di nan un rato pasa cu hala hopi atencion pero sigur ta refleha e manera di sra. Letitia cu mi conoce for di tempo di Directie Geneesmiddelen’ e mandatario a enfatisa. E manera directo cu sra. Letitia ta, si e tin algo pa bisa bo, e ta bisa bo esaki directo e no ta bira rond di loke e kier bisa bo y esey mi por a sinti tambe den su poesianan con e ta expresa esaki a traves di emocion. 

 

Sra. Letitia a dedica su butishi di poesia na su ruman sra. Marie Odette Dabian-Wever y su difunto esposo sr. Miro Dabian kendenan tabata e motornan tras di e publicacion di e poesianan. Na un forma unico cu santo blanco sra. Marie Odette Dabian-Wever a bendiciona e buki di poesia “Emocion den Palabra” di su ruman sra. Letitia Wever

Por ultimo Minister Endy Croes ta felicita sra. Letitia Wever pa un bunita buki di poesia,  manera sra. Wever a bisa no tabata facil pero no a ‘give up’ y a sigui traha duro a traves di su emocion y cu perseverancia pa logra su meta final cual ta pa e buki wordo lansa. Pabien tambe na tur cu a duna un man den e trayecto como tambe na patrocinadornan cu a contribui cu un bunita obra cu sigur tur Arubiano mester tin den nan coleccion. Masha masha pabien sra. Letitia y danki pa comparti bo emocionnan cu nos.