Home Dutch Kingdom E Hulandes cu mas tempo encarcela den exterior, lo por recobra su...

E Hulandes cu mas tempo encarcela den exterior, lo por recobra su libertad despues di 38 aña cera den prison na Merca

SHARE

California, Estados Unidos:

Un comision mericano a duna un conseho positivo pa laga Jaitsen Singh (77) den libertad condicional. E hulandes Jaitsen Singh tin 38 aña preso na Estados Unidos, pero ainda tin un investigacion andando relaciona cu abuso sexual.

Singh sentencia cu 56 aña di castigo di prison
Na 1986 Singh wordo sentencia cu 56 aña di castigo di prison, pa motibo cu supuestamente e lo a duna ordo pa asesina su señora y su hijastra. E la pidi pa sinta e resto di su castigo na Hulanda, segun su persona e ta cumpli cu e exigencianan pa yega na remark’e. Pero e Gabinete Hulandes anterior a nenga di duna nan cooperacion pa cu esaki. Segun Hulanda, Singh tin mucho poco vinculo cu Hulanda. Prome cu e la wordo aresta, ya caba e tabata tin 13 aña bibando na Merca y e la biba solamente 4 aña na Hulanda.

Aña pasa Singh a entama un kortgeding contra Hulanda, den cual e la pidi Hulanda pa e bay sinta e resto di su castigo na Hulanda, pero e la perde esaki. Corte na Den Haag a rechasa su peticion.

Pruebanan haya cu e no ta culpabel
Singh na e momentonan aki ta e Hulandes cu tin mas aña cera den exterior. Despues di su prome strafproces a bin resulta cu e testigo principal lo a wordo cumpra pa e fiscal y cu e Surnameo di nacionalidad Hulandes a wordo sentencia inhustamente.  Den transcurso di e añanan, e la sigui colecta pruebanan cu e no ta culpabel di cual e la wordo sentencia p’e.

Mocion entrega den tweede kamer
Na juni 2020 te hasta den Tweede Kamer un mocion a keda entrega, den cual a pidi gobierno Hulandes pa haci tur lo posibel pa honra e peticion di Singh y pa traslada Singh pa un prison na Hulanda.

Mientrastanto riba 21 di april ultimo, un comision na Merca a conseha pa laga e hulandes den libertad condicional y cu eventualmente e lo por biaha pa Hulanda. E sentencia aki no ta uno definitivo, ainda falta un sentencia mas di cual e lo wordo husga entre otro pa meritonan legal, esaki lo por dura maximo 120 dia.

Abusonan sexual
Famianan di e victimanan no kier pa Singh wordo laga den libertad. Nan ta sigui acusa Singh di a abusa sexualmente di su hijastra. Ainda tin un investigacion andando, referente esaki.
E famianan ainda ta teme y ta bisa cu Singh ta keda un peliger pa comunidad.

Hulanda a bay di acuerdo pa Singh sinta su castigo na Hulanda
Na final e gobernador di California tin maximo 30 dia di tempo pa tuma un desicion. E gabinete Hulandes mientras tanto por medio di varios carta dirigi na e gobernador di California a duna di conoce, cu nan lo sostene e desicion di laga Singh bay sinta su castigo na Hulanda, mirando cu e no lo forma un peliger mas pa ripiti locual e la wordo sentencia p’e.

Curpanan a wordo haya den bahul di auto
Jaitsen ta electricien di profession y na 1970 e la bay biba na Ontario California, hunto cu su casa Grace, su yiu homber y su hijastra Daphne. Riba 27 di augustus 1983, e curpanan di Grace y Daphne a wordo haya den bahul di e auto di Grace. Grace a wordo severamente maltrata cu un bate di basebal y Daphne (14) a wordo hinca varios biaha cu cuchiu. Ambos a fayece na e heridanan serio cu nan a ricibi.

Un solo testigo
Na april 1984 a base di declaracion di un testigo Raymond Copas kende e tempo ey, e mes tabata preso, Singh a wordo deteni. Na 1986 Singh a wordo sentencia cu 56 aña di castigo di prison pa supuestamente a duna ordo pa a mata su hijastra y su señora.
E sentencia a wordo basa riba e declaracionnan di un supuesto testigo cu tabata Copas. Copas despues di tempo a hala su declaracion aden y un poco tempo despues Copas a fayece na momento cu polis a bay pa areste.

Singh no tin nada di haber cu e asesinato
Tambe cu tempo, for di algun declaracion y dossiernan a bin resulta cu Singh no lo tabata tin nada di haber cu e dobbel asesinato. E viuda di Copas y un ruman di un di e supuesto asesinonan den e caso aki a firma cu Singh no ta culpabel pa e dobbel asesinato aki.

Fiscal corupto
E declaracion di e testigo, cu a wordo usa pa sentencia Singh, despues di un investigacion di un private dective y di FBI a bin resulta cu e Fiscal di e tempo ey Dennis Stout tabata haci varios acto di corupcion den casonan penal y cu e tabata cumpra e testigonan y entre otro Copas tambe a wordo cumpra. Nunca corte a scucha e yiu homber di e pareha Singh, semper a tene pafo di e proceso.

Singh su salud no ta 100% mas
Singh tabata encarcela na San Quentin State Prison na San Francisco y na 2017 e la wordo traslada pa California Medical Facility na Vacaville. Na 2020 e la wordo contagia cu Corona Virus y desde e tempo ey e ta den isolacion y ta haya oxigeno via mashin. Esaki segun su abogado Rachel Imamkhan.