Home » Parlamentario Marco Berlis (MEP): Conoce bo derechonan laboral

Parlamentario Marco Berlis (MEP): Conoce bo derechonan laboral

by Admin
0 comment 72 views

 

No sucumbi na ningun abuso y menasa, para firme y educa bo mes!

 

Abuso laboral ta un problema grandi na Aruba.

Abuso laboral ta wordo practica den diferente compania, pero tambe por wordo encontra den e sector publico. Esaki no ta un secreto. Tin diferente tipo di accionnan y forma di abuso na trabao. Pa menciona algun; abuso verbal, avansenan sexual indesea, menasanan di diferente tipo, menasa pa kita permiso, menasa cu mester traha overtime sin pago, menasa cu bo no mag di uni bo mes na un sindicato pasobra lo tin consecuencia y asina por sigui menciona. Tur esakinan ta un forma di abuso cu no ta permisibel, ta contra e ley laboral y derechonan di e trahador. 

 

Ora cu bo no conoce bo derechonan, menasa tin poder riba bo

Educa bo mes den e diferente derechonan laboral y e ley di labor. Bo por haya masha hopi informacion mes riba e website di www.daoaruba.com y tambe www.overheid.aw. Akinan por wak brochures di entre otro: Cessantia Verordening, Werknemer en ontslag, de arbeidsovereenkomst, y mucho mas. Hopi informacion alcaso y necesario pa bo por protege bo mes y para pa bo derechonan laboral. Si bo no ta educa bo mes, ta mas facil pa bo sucumbi bao e presionnan di menasa y abuso laboral. Mas bo conoce bo derechonan mas fuerte bo ta para contra cualkier abuso y menasa. 

 

Kico bo por haci den casonan di abuso laboral?

  1. Documenta tur cos. Acumula documentonan, prueba cu potret, grabacion di video etc.
  2. Busca pa informa un supervisor of manager, cu no ta causando esaki, kico ta sucediendo. Den caso di hotel, casino y otro companianan, bay departamento di HR.
  3. Si esaki no yuda bay busca bo derecho na Directie Arbeid en Onderzoek. (tel. 5237720)
  4. Si esaki no yuda un opcion ta pa forma un aliansa y busca sindicato of abogado di bo escogencia.

Consehonan practico ora nan kier kitabo sin motibo.

  1. Nunca firma nada. Nunca firma un warning, un terminacion di contract of cualkier documento obliga. Bo por tuma e documento si y bisanan bo ta bay lese na cas.
  2. Laga un experto of un hende di experencia den ley laboral conseha bo kico pa haci.
  3. Nunca yega tuma un suma cu nan ta ofrece bo. Busca un opinion legal of experto prome. Bay cas cu e documento. 
  4. Keda semper cu e actitud corecto y profesional. Cumpli cu bo trabao y no duna ningun motibo pa nan perhudica bo.

Si ainda despues di tur esaki bo ta keda wordo presiona, maltrata y abusa contact mi persona pa wak kico mi por haci pa bo. Y for di akinan mi ta haci un peticion na tur doño di trabao, managers y supervisornan; trata bo trahadornan bon. Respeta nan derechonan laboral. Crea un atmosfera di trabao positivo pa tur trahador por produci lo maximo pa bo negoshi. Sea husto den bo trato di tur empleado. Sea consciente, cu ami como representante di pueblo lo mi denuncia y confronta situacionnan di abuso y inhusticia directamente y sin miedo!

Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio