Home Politics Minister Xiomara Maduro den su discurso di inclusion financiero di e hende...

Minister Xiomara Maduro den su discurso di inclusion financiero di e hende muhe na Aruba: Un grupo grandi di hende muhe ta activo den comercio na Aruba, ta figura den posicion di maneho y ta ocupa un posicion financiero

SHARE

 

 

ORANJESTAD – Durante e seminario di liderazgo femenino, Minister Maduro a presenta algun informacion di e participacion di e hende muhe den comercio na Aruba y tambe a duna un bista di e cantidad grandi di hende muhe cu ta figura den posicion di maneho of ta ocupa un posicion den e mundo financiero di nos Pais.

 

E hende muhe ta activo den comercio

For di cifranan compila pa Camara di Comercio por mira cu tin un grupo grandi di hende muhe cu ta activo den comercio na Aruba. Den un grafico presenta, e mandatario a splica cu den e ultimo 5 aña, tin 3225 hende muhe cu ta forma parti di e hunta di directiva den e mundo empresarial. Di e grupo aki, 36% ta doño di un compania, 31% ta director di compania, 6% ta miembro di hunta di directiva, 6% ta representa como apoderado y 5% ta den funcion di secretario. Si compara cu e hende homber den sector comercial, por bisa cu e hende muhe ta bon representa cu 42% compara cu e 58% di e presencia masculino.

 

Casi mitar di posicion di maneho ta den man di hende muhe

Informacion compila pa Departamento di Estadistica, Banco Central y Departamento di Labor, ta revela cu mas hende muhe ta tuma e reto di un funcion den maneho. Casi mitar (49.4%) di e posicion nan di maneho na Aruba ta wordo ocupa pa un hende muhe. 

 

Un grupo grandi di hende muhe ta ocupa un posicion financiero

Den e mundo financiero na Aruba, na 2019 un total di 49% tabata hende muhe. Compara cu aña 2010 cu 51%, tin un bahada di locual ta e hende muhe activo den e mundo financiero, pero asina mes e representacion di e forza femenino den e mundo financiero ta grandi.