ORANJESTAD. Diaranzon mainta Minister di Turismo sr. Dangui Oduber, hunto cu Minister di Deporte sr. Endy Croes, y tambe sra. Ronella Croes di Aruba Tourism Authority (ATA), a reuni cu Mr. Kees Van Muiswinkel pa cu e di 4 edicion di KLM Aruba Marathon. E evento aki lo ta tumando lugar ariba dianan 4 y 5 di juni.
E encuentro tawata uno bon, caminda a informa tocante e actividadnan cu lo tin ariba e 2 dianan aki. Tambe a menciona cu ta yegando coredonan di 27 diferente pais, Antigua, Argentina, België, Bonaire, Brazilië, Cambodia, Canada, Chili, Colombia, Curacao, Duitsland, Ecuador, Estonia, Frankrijk, Georgia, Engeland, Hongarije, Italie, Mexico, Nederland, Noorwegen, Panama, Paraguay, Polen, St. Maarten, Venezuela en de Verenigde Staten.
Un total di mas o menos 500 persona internacional y 2,000 Rubiano lo ta participando e aña aki. E participantenan cu ta yega di varios pais, no ta bin nan so. Nan ta yega Aruba cu nan famia pa despues di e marathon disfruta di nos dushi isla. Sr. Ronella Croes di ATA a splica cu ta tuma e oportunidad di e evento aki pa promove Aruba como un isla activo.
Tambe Mr. Kees Van Muiswinkel a duna un danki na Ibisa. Ibisa ta un partner hopi special den e marathon aki, paso sin nan, no lo por organiza un evento di magnitud asina grandi. Nan ta persona nan cu ta traha dia aden y dia afor pa deporte, pero sigur tambe pa salud di Aruba.
Minister Dangui Oduber a duna danki na Mr. Kees di KLM Marathon Aruba pa e bunita medaya cu a ser duna na su persona pa di 4 edicion di KLM Aruba Marathon.