Home » Parlamentario Alvin Molina:  Mi Mes Un Heroe ta un proyecto cu ta enfoca riba prevencion

Parlamentario Alvin Molina:  Mi Mes Un Heroe ta un proyecto cu ta enfoca riba prevencion

by Admin
0 comment 63 views

 

Prevencion ta e yabi pa un comunidad mas sigur 

 

Pa nos traha pa logra cambio di berdad y na un manera sostenibel riba siguridad den comunidad nos tin cu inverti den husticia, area social y enseñansa. Nos tin cu frena criminalidad na su origen, den nos barionan. Y esey ta rekeri esfuerso y un bon colaboracion entre tur 3 area di e ‘triangulo di siguridad’.

Muchanan cu ta ricibi un bon educacion, tin mas chens riba un futuro laboral exitoso, menos chens pa nan bay den mal caminda. Famianan saludabel, cu tin cuminda riba mesa, bibando den un bario yen actividadnan positivo, tin mas chens pa yuda desaroya y eleva nan comunidad, haci’e uno mas sigur. Un aparato hudicial efectivo lo haci e decision pa comete un acto penal mas dificil. Sinembargo, criminalidad no ta algo cu nos por elimina por completo.

 

Lastimamente abuso di mucha den nos comunidad, manera den tur otro, ta algo real. Cada caso ta un di mas. Nos mester usa cualkier oportunidad pa stop e fenomeno repugnante aki. Pesey mi ta hopi contento cu gobierno, y specialmente sra Edselyn Figaroa, su ekipo y su muchanan y nan mayornan diasabra ultimo a lansa e proyecto ‘Mi Mes Un Heroe’. Despues di 10 aña di esfuerso, finalmente Edselyn a haya oido na bureau di nos Minister di Husticia y Asuntonan Social sr Rocco Tjon.

 

Mi Mes Un Heroe den comunidad

Mas o meno 600 mucha a forma parti di e proyecto aki. Esaki ta nifica cu ya caba nos tin 600 mucha cu ta miho ekipa, educa, motiva pa evita cu un abuso di cualkier forma por tuma luga. E manera cu e mensahe ta wordo treci dilanti, sigur muchanan lo capta e mensahe y lo bay ehecuta loke nan a siña. E ta traha preventivo di banda di e muchanan, pero tambe un posibel abusador lo pensa mas biaha prome cu e ataca un mucha, door cu e chens ta grandi cu e mucha lo no acepta esey y lo alerta mayornan, educadornan, instancianan. E proyecto aki ta percura pa ekipa nos muchanan cu hermentnan cla cu nan por uza si nan haya nan mes den situacionnan desagradabel cu un malhechor. 

 

Mi Mes Un Heroe den enseñansa

E plan di nos Minister di Enseñansa sr. Endy Croes ta pa e proyecto wordo trata structuralmente den tur scol akinan na Aruba. Esaki sigur ta un desea cu mi mes tin tambe mirando e importancia y relevancia di e bunita proyecto aki. ‘Mi Mes Un Heroe’ tin planea, pa cuminsa Augustus benidero y lo core pa 2 aña sigur. E topico ‘abuso di mucha’ ta algo cu ta tuma su tempo pa e bira parti di nos comunidad y den e caso aki pa e bira algo cu ta biba den nos muchanan, cu nan mes por aporta na nan mesun siguridad. Sigur mi deseo ta pa e programa aki dura hopi mas cu 2 aña.

 

Mi kier termina mandando un palabra di pabien y danki na Edselyn Figaroa, su ekipo, e muchanan y nos ministernan pa haci e proyecto aki posibel. Mi kier invita ful comunidad, scolnan, centro di barionan, iglesianan, clubnan deportivo, scouting y tur otro gruponan den nos comunidad pa bay riba e Facebook page di ‘Mi Mes Un Heroe’. Like y share e page, y hopi importante, comparti e informacion aki cu nos muchanan. Hunto nos ta contribui na un sociedad mas sigur pa nos muchanan.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio