ORANJESTAD – Diasabra anochi, durante un evento unico y special, den presencia di Gobernador di Aruba Sr. Alfonso Boekhoudt, Minister President Sra. Evelyn Wever-Croes, Colega Minister di Enseñansa y Deporte Sr. Endy Croes, Parlamentarionan, profesionalnan den e veld social, FIDAC, TeleAruba y mayornan a lansa e videoclip “E ta mi curpa” como tambe e teaser oficial di e campaña nacional contra abuso di mucha; “Mi Mes Un Heroe”. Durante e evento aki, Minister di Husticia y Asuntonan Social Sr. Rocco Tjon a presenta e proyecto unico aki, cual recientemente a keda aproba pa Parlamento di Aruba. Un proyecto cu lo conta cu sosten di, principalmente, Ministerio di Enseñansa y Deporte pero tambe demas ministerionan. Un proyecto cu ta parti den tres fase, di cual e prome dos fasenan lo conta cu e colaboracion di TeleAruba pa asina lansa e 52 episodionan educativo.
Ministerio di Husticia y Asuntonan Social a wordo aserca pa TeleAruba, cu e propuesta di un programa di television educativo pa asina trece conscientisacion contra abuso di mucha na Aruba. Despues di a reuni cu varios miembronan den e veld social, a toca e turno pa reuni cu Sra. Edselyn Figaroa y Sra. Liza Helder, di Fundacion Instituto Desaroyo pa Arte y Cultura (FIDAC) kendenan ta e motor tras di “Mi Mes Un Heroe”. Ora a wak y scucha e presentacion, a keda asombra con bon e proyecto ta hinca den otro, y a cumpli cu tur rekisito cu a wordo menciona pa e expertonan den e veld social. Segun e mandatario, e no ta kere den coincidencia y ora a scucha e presentacion di Edselyn y Liza, no a pensa mes pa reinventa e wiel, y a wak e proyecto aki como uno duradero na e bienestar di nos muchanan.
Edselyn Figaroa ta un persona clave den e proyecto aki, mirando cu el a bin ta traha dies aña riba e proyecto aki. Un proyecto cu el a presenta 16 biaha y na e di 17 biaha a haya e oido rotundo di Minsiterio di Husticia y Asuntonan Social pa hunto realisa un proyecto di e magnitud aki. Manera a wordo menciona, e proyecto aki ta parti den tres fase, di cual e prome dos fasenan lo ta 52 episodio educativo yena di cancionnan basa riba e buki di Mi Mes Un Heroe, cual lo cuminsa na Augustus 2022 pa medio di TeleAruba. E di tres fase ta pa lansa e buki di “Mi Mes Un Heroe” na scolnan, cual ta consisti di 10 capitulo cuminsando na e parti di prevencion y ta caba na e parti curativo. Actualmente, e buki ta den revision serca profesionalnan den e veld y psicologonan pa asina duna aun mas contenido na e buki aki. Pa e motibo aki, ta conta cu sosten di Ministerio di Enseñansa y Deporte pa asina por realisa cu e buki aki pronto por drenta scolnan y bira parti di e curiculo a largo plaso.
Por ultimo, kier añadi cu Ministerio di Husticia y Asuntonan Social ta un ministerio unico, pa motibo cu hopi biaha husticia y asuntonan social ta bay man den man cu otro. Den cuadro di esaki, Minister Tjon a indica cu e tematica aki ta cay man den man cu Husticia y pa e motibo ey a percura pa tuma diferente accionnan; ya caba a certifica nos Jeugd en Zeden Politie. Banda di esaki, a ekipa e sala di interogacion cu material nobo, a percura pa Aruba por haya su propio dokter forensico pa asina yega na un “waarheidsvinding” mucho mas solido ora di presenta e caso na hues. Tambe, tin e proyecto di e Family Justice Center andando, cu ya caba ta dunando diferente trainingnan na Agentenan Policial pero tambe na e veld social, pues e tematica aki ta hayando su debido atencion. E mandatario a manda palabranan di pabien na tur esnan cu a haci e proyecto aki uno posibel, principalmente Edselyn Figaroa y Liza Helder di FIDAC, TeleAruba, tur profesional den e veld social como tambe beleidmedewerkers di Ministerio di Husticia y Asuntonan Social. Pronto nos muchanan lo haya e oido, e cuido y e atencion cu nan merece.