Home » PROME MINISTER EVELYN WEVER – CROES: “ORA CU EMPODERA NOS MUCHANAN EOREY POR PROTEHANAN MAS NA TEMPO”

PROME MINISTER EVELYN WEVER – CROES: “ORA CU EMPODERA NOS MUCHANAN EOREY POR PROTEHANAN MAS NA TEMPO”

by Admin
0 comment 77 views

 

 

 

ORANJESTAD – Pa Gabinete Wever – Croes I y II, e topico di abuso di menor y  abuso sexual di mucha, ta un topico di prioridad hopi halto. Sin bay den e cifranan, ta di acuerdo cu cada caso, ta un caso dimas. Pesey e compromiso di Gobierno ta pa bringa e abusonan aki. Den cuadro di esaki, a lansa e campaña nacional “Mi Mes Un Heroe”, cu e meta pa empodera muchanan y combati abuso.  

 

Covid a dal nos Pais hopi duro y lamentablemente el a empeora e situacion riba tereno di abuso sexual di menor. “Nos muchanan ta wak nos como adulto y ta spera cu nos ta stimanan, yudanan, empoderanan y protehanan. Lamentablemente ta mira cu tin biaha adultonan ta faya e muchanan y ora cu esaki tuma luga, tur adulto a faya nos muchanan. Pesey Gobierno ta continua cu esfuersonan pa combati abuso contra muchanan y ta pidi e compromiso di cada adulto pa hunto combati esaki y ofrece nos muchanan e proteccion cu nan merece,” Prome Minister a expresa.  

 

Trabounan haci y cambio di strategia

Durante di e ultimo añanan, Gobierno di Aruba a traha riba diferente aspecto pa combati e tipo di abusonan aki. Entre otro: a aumenta e castigo maximo na 2020, a traha riba e reglanan cu un delito asina no ta caduca mes liher cu antes, a traha tambe riba un ‘central meldpunt’, codigo di proteccion y tin mas cambio cu ta trahando riba dje. 

Sinembargo ora cu mira tur locual cu a haci y ainda ta mira cuanto caso ta tuma luga, a realisa cu mester cambia e strategia. E strategia cu lo introduci aworaki ta, pa empodera muchanan mes, pa nan tambe por yuda proteha nan mes. Pa nan sa ki ora pa bisa no y busca un hende di confiansa pa bisa kico ta pasando, pa por protehanan mas na tempo, Prome Minister a splica. “Lamentablemente gran cantidad di e casonan di abuso sexual di menor cu ta tuma luga, ta door di un abusador cu ta cerca di e famia. Sea ta un familiar, omo, ruman, abuelo, abuela, tanta, primo, prima of amistad di mayornan.” 

Premier Wever – Croes a sigui splica cu un otro hecho lamentabel ta, cu ni cuanto aumenta castigo, introduci meldpunt of codigo, si mayornan no tene mihor cuenta cu ken ta laga nos yiunan, no lo caba cu e abusonan aki nunca. Pero si nos yiunan siña con pa nan pidi ayudo eorey ta sigur cu por logra hopi mas. 

 

Prome Minister a expresa di ta sumamente contento cu e proyecto aki y ta gradici colega Minister Rocco Tjon cu a tuma e encargo di e area social pa sigui cu esfuerso cu a cuminsa cu ne durante e crisis plan social. 

Den nomber di Gobierno di Aruba ta gradici henter e veld social cu ta trahando cu alma y cuerpo riba e tematica aki. Ademas, ta gradici sra. Edselyn Figaroa y Liza Helder, e muchanan y mayornan pa nan presentacion durante lansamento di e campaña. 

Por ultimo, Prome Minister a pidi cada adulto pa reconfirma nan compromiso cu e muchanan, poniendo tur diferencia un banda y pa pone esfuerso pa proteha cada mucha. “Nos muchanan merece amor, cariño y proteccion.” 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio